Batys Qazaqstanda 49 eldi mekendi sý basý qaýpi bar

ORAL. QazAqparat – Batys Qazaqstan oblysynda 49 eldi mekenge kóktemgi tasqyn kezinde 49 eldi mekenge sý basý qaýpi tónýi yqtımal, dep habarlaıdy QazAqparat tilshisi.

BQO TJ departamentiniń bastyǵy Ernur Ótegenovtiń óńirlik kommýnıkatsııalar qyzmeti alańynda ótken brıfıngide málim etkenindeı, óńirde 109 eldi mekenge sý basý qaýpi tónýi múmkin bolyp eseptelse, sonyń 59-ynda qaýip tómendedi. Bireýinde qaýip joıyldy.

Onyń sózine qaraǵanda, «Qazgıdromet» RMK málimeti boıynsha bıyl qardaǵy sý qory ótken jylǵa qaraǵanda, 16 paıyzǵa joǵary. Ótken jyly qardyń bıiktigi 70 mm bolsa, bıyl 83-ke jetken.

Esesine topyraqtyń qatý kórsetkishi tómen.

Eger naýryz aıynyń basynda kún kúrt jylynyp, qar tez erise, keıbir eldi mekender men úı aýlalaryna, jol ýchaskelerine qaýip tónýi múmkin.

«Bıyl 3-4 naýryzda ótetin «Kóktem-2022» respýblıkalyq komandalyq-shtabtyq oqý-jattyǵýdyń ortalyǵy Oralda bolmaq. Respýblıka TJ vıtse-mınıstriniń qatysýymen úlken jıyn ótedi. Kóktemgi sý tasqynyn qaýipsiz ótkizý úshin 24 aqpannan bastap barlyq múddeli uıymdar kúsheıtilgen jumys rejımine kóshti», dedi E.Ótegenov.

Qazirgi kezde qala men eldi mekenderden qar shyǵarý jumystary jalǵasýda.

Eske sala keteıik, budan buryn Batys Qazaqstanda 2 respýblıkalyq, 6 oblystyq joldyń jabylǵanyn jazǵan bolatynbyz.