Batys Qazaqstanda 49 eldi meken tarap ketýi múmkin

ORAL. QazAqparat – Batys Qazaqstan oblysynda 49 eldi mekenge tarap ketý qaýpi tónip tur, dep habarlaıdy QazAqparat tilshisi.

BQO strategııa jáne ekonomıkalyq damý basqarmasynan málim etkenindeı, bul eldi mekender (barlyǵy 1166 adam) turǵyndar sany jóninen aýyl mártebesine sáıkes kelmeıdi, ıaǵnı 50 adamnan kem.

Bórli aýdanynda osyndaı 4, Jánibekte 3, Báıterekte 8, Kaztalovta 1, Qaratóbede 3, Syrymda 8, Tasqalada 7, Terektide 5, Shyńǵyrlaýda 8, Oral qalasy aýmaǵynda 2 eldi meken bar.

Atalǵan eldi mekenderde mektepter jabylǵan. Densaýlyq saqtaý nysandary 8-inde, ortalyq sýmen qamtý júıesi bireýinde, gaz 9-ynda ǵana bar. Shyńǵyrlaý aýdanyndaǵy Sulýkólde turǵyn qalmaǵan, odan basqa eldi mekenderdiń bárinde elektr jaryǵy bar.

«Qazaqstan Respýblıkasynyń ákimshilik-aýmaqtyq qurylysy týraly» 1993 jylǵy 8 jeltoqsandaǵy № 2572-XII Zańyna sáıkes turǵyndar sany 50 adamǵa jetpeıtin eldi mekender jaqyn mańdaǵy aýyl quramyna qosylady.

Sońǵy úsh jylda oblysta 17 eldi meken (2020 jyly – 8, 2021 jyly – 9) taratyldy.

«Úsh jyl ishinde aýdandardaǵy jergilikti atqarýshy organdar tıisti talapqa saı kelmeıtin eldi mekenderdi taratý nemese solarda turatyn turǵyndar sanyn kóbeıtý arqyly jaǵdaıdy jaqsartý baǵytynda sheshim qabyldaýy tıis», dep habarlady vedomstvodan.

BQO-nyń ákimshilik-aýmaqtyq bólinisi oblystyq mańyzy bar 1, aýdandyq mańyzy bar 1 qaladan, 12 aýdan, 150 aýyldyq jáne kenttik okrýgterden, 314,9 myń adam mekendeıtin 416 aýyldan turady.

«Aýyl – el besigi» jobasy aıasynda perspektıvtik aýyldar qataryna 78 tirekti, strategııalyq mańyzy bar shekara mańyndaǵy 35 jáne jer seriktik baılanysy bar 110 eldi meken kiredi. Bularda 260 myńnan astam turǵyn (82,5 paıyz) bar.

Eske sala keteıik, budan buryn Batys Qazaqstan oblysynda perspektıvti aýyldar iriktelgenin jazǵan bolatynbyz.