Batys Qazaqstanda 3800-den astam adam revaktsınatsııadan ótti

ORAL. QazAqparat – Batys Qazaqstan oblysynda 3831 adam revaktsınatsııadan ótti, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, sondaı-aq 3549 adam Pfizer kompanııasynyń vaktsınasyn qabyldady.

Sonyń 2086-sy jasóspirimder bolsa, 99-y – júkti, 1364-i – bala emizetin áıelder.

Vaktsınatsııa bastalǵannan beri oblys boıynsha barlyǵy 251 992 adam (egilýge tıisti turǵyndardyń 60,8 paıyzy) birinshi komponentpen egilse, sonyń 127 742-si – Oral qalasynda turatyndar.

Sondaı-aq 236 672 adam (57,1 paıyz) ekinshi komponentti de saldyrdy.

Basqarmadan túsken málimetke qaraǵanda, sońǵy aptada aldyńǵymen salystyrǵanda, koronavırýs juqtyrý kórsetkishi 1,5 paıyzǵa (18 naýqasqa) tómendedi.

Pandemııa bastalǵannan beri óńirde 39 916, bıyl 30 695 adamnan indet tabyldy.

Kúni búgin 286 adam ambýlatorlyq, 96 naýqas statsıonarlyq em qabyldaýda. Sonyń 14-i jansaqtaý bólimshesinde, jaǵdaılary aýyr. Bulardyń tórteýi ınvazıvti emes jasandy tynys alý apparatyna, 10-y ottegi kontsentratoryna qosylǵan.

Jyl basynan beri 674, sońǵy aptada 3 adam koronavırýstan kóz jumdy.

Eske sala keteıik, budan buryn BQO-da 251 myń adamǵa vaktsınanyń birinshi komponenti salynǵanyn jazǵan bolatynbyz.