Batys Qazaqstanda 254 oqýshy «Altyn belgiden» úmitker
BQO bilim basqarmasynyń basshysy Aıgúl Myńbaevanyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 254 túlek «Altyn belgiden», 248-si úzdik attestat alýdan úmitker.
Aıgúl Ádilgereıqyzynyń sózine qaraǵanda, sondaı-aq 9834 oqýshy 9-synyptardy támamdaıdy. Sonyń 804-i úzdik attestattan úmitker bolyp otyr.
Óńirde 9 synyp bitirýshileri úshin qorytyndy mektep bitirý emtıhandary 2-13 maýsym aralyǵynda ótedi. Al 11-synyp bitirýshileri úshin memlekettik emtıhandar 5-19 maýsym aralyǵynda bolady. 9 synyptarda 4 pánnen emtıhan tapsyrady: oqytý tili (qazaq/orys tili), matematıka (algebra), qazaq tili men ádebıeti/orys tili men ádebıeti, tańdaý páni. 11 synyptarda 5 pánnen emtıhan tapsyrady: oqytý tili (qazaq/orys/ tili), algebra jáne analız bastamalary, Qazaqstan tarıhy, qazaq tili men ádebıeti/orys tili men ádebıeti, tańdaý páni.
Oblys boıynsha túlekterge jalpy orta bilim berý týraly attestat óz mektepteriniń qabyrǵasynda 22 maýsymda tapsyrylady.
Batys Qazaqstanda barlyǵy 379 mektep bolsa, sonyń 64-i oblys ortalyǵynda ornalasqan. Bularda barlyǵy 118 myńnan astam oqýshy (61,4 myńy Oral qalasynda) bilim alady.
Basqarma basshysynyń aıtýynsha, QR Oqý-aǵartý mınıstriniń buıryǵyna sáıkes mektepterde oqý merzimi 31 mamyrda aıaqtalady. Bul kúni barlyq mektepter bekitilgen kestege sáıkes sabaqtaryn júrgizedi. Sabaq sońynda árbir synyp jetekshisi synyp saǵatyn ótkizedi. Synyp saǵattarynyń stsenarıılerin muǵalimder ár synyptyń jas erekshelikterin eskere otyryp, derbes ázirleıdi.
Mektepter saltanatty shara ótkizý nemese oqý jylyn synyp saǵattarymen aıaqtaý jóninde sheshimdi ata-analar komıteti, qamqorshylyq keńespen aqyldasa otyryp derbes qabyldaıdy.
Mınıstrlik oqý jylynyń aıaqtalýy boıynsha saltanatty is-sharany 1 maýsymda – Halyqaralyq balalardy qorǵaý kúnine oraılastyryp jáne sonyń formatynda ótkizýdi usynady.
Synyp saǵattaryn, saltanatty lıneıkalar, attestat tapsyrý sharalaryn ótkizgen kezde pedagogıkalyq etıkany saqtaý jáne sybaılas jemqorlyqtyń aldyn alý maqsatynda ata-analardan is-sharany ótkizýge anımatorlardy, merekelik kesh uıymdastyratyn agenttikterdi, jeke stýdııalardy shaqyrýǵa, mektep ákimshiligine, pedagogtarǵa syılyqqa aqsha jınaýǵa tyıym salynady.
«Tehnıkalyq jáne kásibı bilim berý uıymdary boıynsha qorytyndy attestattaý 28 maýsymǵa deıin jalǵasady. Kolledjderdi bıyl 5 myńnan astam túlek aıaqtaıdy. Qazirgi tańda stýdentter jyl qorytyndysy boıynsha oqý sessııasyn tapsyrýda. Kolledj túlekteri dıplomdyq jáne saramandyq praktıkadan ótýde. Dıplomdardy tapsyrý saltanatyn 28 maýsym men 1 shilde aralyǵynda ótkizý usynyldy», dedi A.Myńbaeva.