Batys Qazaqstanda 18 oqýshy, 14 muǵalimnen koronavırýs anyqtaldy
BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, oǵan qosa mektepke deıin balalar uıymdarynda 3 adamnan, orta arnaýly oqý oryndarynda 3, JOO-da 1 stýdentten indet tabyldy.
N.Mustaevtyń aıtýynsha, olardyń bári de vırýsty úıdegi týystarynan juqtyrǵan.
Búgin «qyzyl» aımaqqa kirgen oblysta bıyl 537 naýqas tirkelip, ótken aıdyń osy kezeńimen salystyrǵanda, 2,8 esege ósip ketti.
Aýyrǵandardyń 29-y 14 jasqa deıingiler bolsa, 10-y – 15- 17, 75-i – 18-25, 131-i – 26-40, 192-si – 41-60 jas aralyǵyndaǵylar, 100-i – alpystan asqandar.
Sondaı-aq 229-y nemese 42 paıyzy – jumys isteıtin turǵyndar, 149-y (27,7 paıyzy) – jumyssyzdar, 100-i (18,6 paıyzy) – zeınetkerler, 14-i (2,6 paıyzy) – medıtsına
qyzmetkerleri.
Syrqattanǵandardyń kóbi Oral qalasynda (360), sonymen qatar Báıterek (64), Bórli (59), Terekti (17) jáne Jańaqala (14) aýdandarynda tirkelip otyr.
«Jyl basynan beri memlekettik shekaradan anyqtamasyz ótken 184 jolaýshynyń bireýinen koronavırýs tabyldy.
Halyqaralyq júk tasymalymen aınalysatyn, anyqtamasy joq 92 júrgizýshiden alynǵan PTR test olardyń indetke shalynbaǵandyǵyn kórsetti. Sońǵy kezde koronavırýstyń
órshýine baılanysty sanıtarlyq talaptar kúsheıtildi», dedi N.Mustaev.
Eske sala keteıik, budan buryn BQO-nyń «qyzyl» aımaqqa enýine baılanysty qatań shekteý sharalary engiziletinin, óńirde 600-ge jýyq adamnan koronavırýs tabylǵanyn jazǵan bolatynbyz.