Batys Qazaqstanda 13 jasar bala sýǵa batyp kete jazdady

ORAL. QazAqparat - Batys Qazaqstan oblysynda sýǵa batyp kete jazdaǵan 13 jasar balany jergilikti turǵyn qutqaryp qaldy. BQO TJD baspasóz qyzmetinen túsken málimetke qaraǵanda, oqıǵa 3 maýsym kúni shamamen saǵat 16:50-de Shyńǵyrlaý aýdanynda bolǵan, dep habarlaıdy QazAqparat tilshisi.

Shyńǵyrlaý aýyly mańyndaǵy Elek ózenine úsh bala sýǵa shomylýǵa barǵan.

Bireýi sýǵa batyp bara jatady. Qasynda bolǵan balanyń biri 112 nómirine habarlasyp, aıqaılap, aınalasyndaǵylardy kómekke shaqyrǵan.

Sol Elek ózeni jaǵalaýyndaǵy Naberejnaıa kóshesinde 29-úıde turatyn Denıs Lıpın aıqaıdy estip, júgirip barady. Sýǵa batyp bara jatqan jasóspirimdi jaǵaǵa alyp shyǵyp, alǵashqy medıtsınalyq járdem kórsetken.

Osylaısha, Denıs Lıpınniń tez áreket etýiniń arqasynda 13 jasar bala aman qaldy.

Shyńǵyrlaý aýdany TJB bastyǵy Baqtııar Qatchekov qutqarylǵan balanyń úıine kirip, jaǵdaıynyń jaqsy ekendigine kóz jetkizdi.

Eske sala keteıik, budan buryn jasóspirimniń Jaıyq ózenine batyp ketkenin jazǵan bolatynbyz.