Batys Qazaqstanda 100-ge jýyq turǵyn úıdi sý basty

ORAL. QazAqparat – Batys Qazaqstan oblysynda 100-ge jýyq turǵyn úıdi sý basty. Bul týraly QazAqparat tilshisi QR Tótenshe jaǵdaılar mınıstrligine silteme jasap habarlaıdy.

BQO TJ departamentiniń jedel shtaby málim etkenindeı, qardyń kúrt erip, jaýyn-shashyn túsýine baılanysty Jánibek aýdanynda 2 sáýir kúni saǵat 23.00-den bastap eki aýylǵa sý kirdi.

Jaqsybaı aýylynda 97 úı sýǵa ketti. Jergilikti atqarýshy organdar jáne shekara qyzmeti kúshimen 637 adam evakýatsııalandy. Sonyń 305-i (89-y – balalar) M.Yqsanov atyndaǵy mektep-balabaqsha kesheni ǵımaratyna, 332-si (70-i – balalar) jaqyn-jýyqtarynyń úılerine ornalastyryldy.

Sondaı-aq Talov aýylynda 2 úıdi sý alyp ketti. 8 adam (ekeýi – balalar) týystaryn panalady.

TJ (5 qyzmetker, 1 motopompa), jergilikti atqarýshy organdar (142 adam, 11 tehnıka), shekara qyzmeti (15 áskerı qyzmetker, 2 tehnıka) oqıǵa ornynda jumys isteýde.

Jaqsybaı aýylynyń turǵyndary eldi mekendi túgel sý basyp, qıyn jaǵdaıda qalǵanyn, mal shyǵyny bar ekendigin habarlap jatyr.

Qazirgi kezde oqıǵanyń jaı-japsary anyqtalý ústinde.

Eske sala keteıik, budan buryn BQO-nyń Qyzyltal aýylynda 12 úıdi sý basqanyn, tasyǵan sý batystaǵy taǵy respýblıkalyq tas joldy shaıyp ketkenin, óńirdiń taǵy bir aýdanynda tótenshe jaǵdaı jarııalanǵanyn jazǵan bolatynbyz.