Batys Qazaqstan ýnıversıtetinde Ǵaısaǵalı Seıtaqtyń shyǵarmashylyq jyr keshi ótti

ORAL. QazAqparat - Mahambet Ótemisov atyndaǵy Batys Qazaqstan memlekettik ýnıversıtetinde Qazaqstan Jazýshylar odaǵynyń múshesi, Tólegen Aıbergenov atyndaǵy syılyqtyń ıegeri, kórnekti aqyn, qarymdy jýrnalıst, ýnıversıtet túlegi Ǵaısaǵalı Seıtaqtyń jyr keshi ótti. Aqynnyń 60 jyldyq mereıtoıyna arnalǵan kesh «Kóńildiń arhıvinde qalsyn óleń» atty tanym men taǵylymǵa toly shara boldy, dep habarlaıdy QazAqparat.

«Qara shańyraqtyń» qalyptastyrǵan dástúriniń biri - bul óz túlekterimen baılanysyn eshqashan úzbeıtindigi. Ýnıversıtet rektory Nurlan Serǵalıev kezdesý aldynda aqynǵa úlken qurmet kórsetip,  mereıtoıymen quttyqtap, ıyǵyna shapan jaýyp, Mahambet ýnıversıtetiniń maqtanyshyna aınalǵan Ǵaısaǵalı Seıtaqtaı eldiń azamat-tulǵalary ýnıversıtettiń mereıi men maqtanyshy ekendigin jetkizdi», - delingen baspasóz baıanynda.

Sonymen qatar, jyr keshinde «Alash» halyqaralyq ádebı syılyǵynyń ıegeri, Qazaqstannyń eńbek sińirgen qaıratkeri,                   ýnıversıttiń Qurmetti professory Aqushtap Baqtygereıqyzy aqyn inisiniń shyǵarmashylyǵyna tereńnen úńilip, ulttyq boıaýy qanyq, mazmuny tereń óleń joldaryna zerdeli taldaý jasap, kórkemdik qupııasyn ashqandaı boldy. Al ýnıversıtettiń «Qazaq tili men ádebıeti» mamandyǵynyń 2-kýrs magıstranty Amangeldi Gúljanat óz baıandamasynda aqyn shyǵarmashylyǵyna ǵylymı negizde taldaý jasap, aqyn óleńderindegi tarıhı tulǵa beınesine keńinen toqtaldy. Kesh barysynda sóz alǵandar aqyn shyǵarmashylyǵyna toqtalýmen shektelmeı, Ǵaısaǵalı Samıǵollaulynyń óńir jýrnalıstıkasyna sińirgen eńbegin de baǵamdap ótti. Kesh qonaǵy, tarıh ǵylymdarynyń kandıdaty Jańabek Jaqsyǵalıev aqynnyń kóp qyrly talant ıesi ekendigin atap ótip, aqyn shyǵarmalaryndaǵy «tek pen tamyr» fenomeni jaıynda ádemi sóz qozǵady. Al aqynnyń ýnıversıtettegi ustazy Merýet Joldyqaıyrova da stýdentine degen erekshe tilegin jetkizse, stýdenttik kezeńniń esten ketpes, albyrt kóńildiń, sergeldeń sezimniń umytylmas kezeńinde birge oqyǵan, jastyq jyldarynyń kýási bolǵan, stýdenttik dosy, búginde ardager ustaz Qýanysh Taýbaev keshke arnaıy kelip, erekshe estelikterimen bólisti. Dástúrli ánshi Farhat Orazov oryndaǵan «Naryn» áni keshtiń shyraıyn ashqandaı boldy.

Aıta keteıik, aqynnyń 1978 jyldan bastalǵan shyǵarmashylyq joly «Mańdaı», «Aman bol, Atamekenim», «Narynnyń nar uldary», «Aıarýdyń alqasy» jáne jaqynda tusaýy kesilgen «Qasıet qonǵan qara jer» jınaq kitaptarymen tolyqqan. Bul shyǵarmalardyń ózi qazirgi tańda ǵylymı aınalymǵa enip, túrli monografııalar men zertteý jumystarynyń nysanyna aınalýda.

«Jyr áleminde óz orny bar, Aqjaıyq óńiriniń daryndy tulǵasy Ǵaısaǵalı Seıtaqtyń Mahambet ýnıversıtetindegi keshi  jyr súıer qaýymnyń «kóńil arhıvinde óleń qaldyrǵan» áserimen  este qalary aıqyn» delingen baspasóz baıanynda. 

Ǵaısaǵalı Seıtaq «QazAqparat» HAA Batys Qazaqstan oblysyndaǵy menshikti tilshisi. Ol osy qyzmetti 2000 jyldan beri atqaryp keledi. 

 

 

Foto: Rafhat Halelov