Batys Qazaqstan oblysynyń ákimi Joldaýdan týyndaǵan mindetterdi júktedi
Oblystyq Aýyl sharýashylyǵy basqarmasy basshysynyń mindetin atqarýshy Serik Nurmaǵambetovtiń sózine qaraǵanda, Elbasy tapsyrmasyna sáıkes óńirde 122 kooperatıv mal sharýashylyǵyn jáne bireýi ósimdik sharýashylyǵyn damytý baǵytynda qurylýda. 122 kooperatıvtiń 98-i tuqymdy túrlendirýmen, altaýy mal bordaqylaýmen, bireýi sút baǵytynda, 12-si mal bordaqylaýmen ári tuqymdy túrlendirýmen aınalyspaq. Esepke sáıkes, segiz aýdanda 12 kooperatıv qurylyp, tórt aýdan qamtylmaı otyr degen aqparat shyndyqtan alshaqtaý bolyp shyqty. Kooperatıv qurylmaı otyr degen Jánibek aýdanynda 10 kooperatıv qurylyp, tirkeýden ótken, biraq olardyń quramy 20 adamǵa jetpegendikten, tolyqtyrý jumystary júrgizilýde. Bókeı ordasy aýdanynda eki kooperatıv qurylǵan, eki mal bordaqylaý alańy ashylmaq. Bórli aýdanynda bir, Shyńǵyrlaýda 10 kooperatıv qurylǵan. Osyǵan baılanysty óńir basshysy atalmysh basqarmanyń esepke daıyn emestigin, aqparattardy qaıta jınap, salystyryp, naqtylaý kerektigin eskertti.
Oblystyq Jolaýshylar kóligi jáne avtomobıl joldary basqarmasynyń basshysy Mırjan Satqanovtyń málim etkenindeı, 2017 jyly oblys joldaryn jóndeý men kútip ustaýǵa 6 mlrd. 734 mln. teńge bólingen. Óńirge jol qurylysyna 1,2 mln. tonna qıyrshyq tas kerek bolsa, sonyń 200 myńy jetkizilgen. Bıyl jeti aýdanǵa kóshe joldaryn jóndeýge 1,1 mlrd. teńge qaraldy. Basqa bes aýdanda jobalar jasalýda. Bul rette oblys ákimi Bórliden basqa aýdandarda jobalar ýaqtyly jasalmaı otyrǵanyn aıtyp, bul jumysty shıratý qajettigin jetkizdi.
Bıyl óńirde alty mektep boı kóteretinin baıan etken oblystyq Qurylys basqarmasynyń basshysy Arman Óksikbaevqa da Altaı Kólginov tıisti mekeme, aýdandar basshylarymen birge jumystanyp, bıýdjetke engizý úshin qurylys nysandarynyń jobalyq-smetalyq qujattamalaryna qansha kólemde qarjy kerektigin anyqtaýdy tapsyrdy.
Oǵan qosa óńirde mal basyn kóbeıtýge septigin tıgizetin sýarmaly jerlerdi qalpyna keltirý baǵytynda ár aýdan basshysy bir apta ishinde naqty jumys josparyn jasaıtyn boldy. «Nurly jol», «Nurly jer», aýyldyq eldi mekenderdi aýyz sýmen qamtý baǵdarlamalary boıynsha atqarylyp jatqan jumystarmen qatar aldaǵy jylǵy jobalar jóninde qujattama ázirleý kerektigi eskertildi.
Oblys ákimi keńes barysynda basqa da basqarmalar esepterin tyńdaı otyryp, oryndy usynystar eskeriletinin, memlekettik baǵdarlamalardyń oryndalýyna, bólingen qarjynyń ornymen, merziminde ıgerilýine barlyq basshylardyń jaýapty ekendigin atap ótti.