Batys Qazaqstan oblysynyń 3 aýylynda dala órti sóndirildi
«Órt sóndirýshiler men jergilikti atqarýshy organdardyń kúshimen Terekti aýdanynyń Jańa ómir kentindegi órt tolyq sóndirildi jáne Aıtıevo men Novopavlovka eldi mekenderindegi órt aýyzdyqtaldy.
Sonymen qatar, órttiń orman alqabyna ótý qaýpi joıyldy. Qazirgi ýaqytta osy ýchaskelerde belsendi sý tógý jumystary júrgizilip jatyr», - dep málim etti mınıstrlikten.
Eske salaıyq, buǵan deıin BQO-da dala órtimen kúres júrip jatqanyn jazǵan bolatynbyz. Jalyn eldi mekenge jaqyndap, 44 adam evakýatsııalandy.
TJD dereginshe, búgin qurǵaq shóptiń tutanýynyń 41 deregi tirkeldi. Sonyń 20-sy sóndirilse, Oral qalasynda, sondaı-aq Aqjaıyq, Terekti, Bórli, Kaztalov jáne Báıterek aýdanynda 14 órt oshaǵy baqylaýda.
«Ásirese Terekti aýdanynda kúrdeli jaǵdaı qalyptasty. Áıtıev aýyly mańynda 50 ga jer (26 ga – qurǵaq shóp, 24 ga – orman), 2 qora-qopsy otqa orandy. 10 úı (44 adamnyń 16-sy bala) qaýipsiz jerge kóshirildi.
Oqıǵa ornyna oblys ákimi men TJD bastyǵy bardy. Sol sekildi Qumaqsaı aýyly mańynda 25 ga jerde jalynnyń ormanǵa aýysý qaýpi bar. Jańaómir aýyly mańynda ot aýmaǵy anyqtalý ústinde. Kaztalov aýdany Bolashaq aýyly mańynda 4 800 gektar qurǵaq shóp órtenip jatyr. Óńirde órt sóndirý jumysy jalǵasýda», - degen bolatyn TJD baspasóz qyzmetinen.