Batys Qazaqstan oblysynda jyl basynan beri 140 shaqyrymnan astam jol jóndeldi
Baspasóz qyzmetiniń málimetterine qaraǵnda, Batys Qazaqstan oblysynda jergilikti mańyzy bar avtomobıl joldarynyń jalpy uzyndyǵy 5 myń shaqyrymdy quraıdy. Onyń 39 paıyzy normatıvti jaǵdaıda.
Jalpy 2022 jyldyń alǵashqy 8 aıynyń qorytyndysy boıynsha óńirdegi 140 shaqyrymnan astam jol jelisi jóndeýden ótken. Bıylǵy qurylys maýsymynda jol jóndeý jumystaryn 12 merdiger mekeme júrgizýde. Sondaı-aq 10 tehnıkalyq qadaǵalaý uıymy tartylyp otyr.
Qazirgi kúnde «Barbastaý – Aqjaıyq – Inder», «Alǵa – Jalpaqtal –Juldyz – Qarasý» baǵyttaryndaǵy avtokólik joldaryn kúrdeli jóndeý boıynsha jobalaý-smetalyq qujattama daıarlanýda. Jóndeý jumystarynyń aıasynda «Chapaev – Janǵalaı – Saıqyn» jol jelisiniń 267-337 shaqyrymyn jóndeý de qamtylmaq.
Atalǵan jobalardy júzege asyrýǵa 28 myń tonna bıtým qajet. Aımaqta 18 asfaltbeton men 2 beton zaýyty iske qosylyp, 6 temirjol tuıyǵy paıdalanýǵa berilgen.
Aıta keterligi, jol jóndeý jumystarynyń sapasy men onda qoldanylatyn qurylys materıaldary Jol aktıvteri sapasynyń ulttyq ortalyǵy zerthanasynda arnaıy saraptamadan ótkiziledi. Bul ortalyq bıyl 80 jol jóndeý nysanyndaǵy jumystarǵa tekserý-taldaý júrgizgen.
Nátıjesinde 60-tan astam zańbuzýshylyq anyqtalǵan. Sonymen qatar 510 zerthanalyq synama júrgizilip, talapqa qaıshy birqatar kemshilikter aıqyndalǵan. Anyqtalǵan faktiler boıynsha jaýapty merdigerlerge kemshilikterdi qalpyna keltirý boıynsha nusqaýlyqtar berildi.
«Jalpy alǵanda, joǵaryda atap ótken jol jóndeý jumystarynyń aıasynda óńirdegi jergilikti mańyzy bar avtokólik joldarynyń normatıvti jaǵdaıyn 50 paıyzǵa deıin arttyrý kózdelip otyr»,-delingen habarlamada.
Osyǵan deıin Memleket basshysy jol sapasy nashar bolǵany úshin jaýaptylardyń bárin jazaǵa tartý kerektigin aıtqan edi.
Foto: gov.kz