Batys Qazaqstan oblysynda jyl basynan 48 náreste shetinedi

NUR-SULTAN. QazAqparat – Batys Qazaqstan oblysynda jyl basynan 48 shaqalaq kóz jumdy. Bul derekti óńir ákimi Ǵalı Esqalıev Ortalyq kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat tilshisi.

«Bıyl oblysta 48 náresteniń ólimi tirkeldi. Bul ótken jyldyń sáıkes kezeńimen salystyrǵanda kóp. Ólim derekteriniń artýyna birneshe faktor áser etip otyr. Biz júrgizgen zertteýler nátıjesinde shetinegen shaqalaqtardyń kóbinde týa bitti dertter bolǵany anyqtaldy. Al medıtsına mamandary tarapynan ketken qatelikter bolsa, biz olardy qatań jazalaımyz. Qazirgi tańda tıisti mınıstrlik ár oqıǵa boıynsha jeke taldaý, zertteý jumystaryn júrgizip jatyr. Moıyndaý kerek bizde medıtsınalyq qurylǵylardyń jetispeýshiligi baıqalady. Bul da bala men ana óliminiń kóbeıýine sebep bolyp otyrǵan shyǵar»,- dedi oblys ákimi.

Ǵalı Esqalıev ólim-jitim deńgeıin tómendetý úshin bilikti dárigerler tartý jáne aýrýhanalardy medıtsınalyq qurylǵylarmen jabdyqtaý júrgizilip jatqanyn atap ótti. Ulttyq statıstıka bıýrosynyń málimetine sáıkes, byltyr BQO-da 108 náreste kóz jumǵan.