Batys Qazaqstan oblysynda úsh adam sýǵa ketti
BQO TJ departamentiniń baspasóz qyzmetinen málim etkenindeı, qaıǵyly oqıǵa 5 tamyz kúni Báıterek aýdany Jaıyq-2 eldi mekeni mańynda boldy.
«Karer» jasandy sý qoımasynda «Miami park» demalys aımaǵynda («Alı» jeke kásipkerliginiń jeke jaǵajaıy bıylǵy 6 shildede ashylǵan) saǵat 17.40-ta 16 jasar jasóspirim sýǵa ketip qalǵan. Onyń denesin jedel qutqarý jasaǵynyń qyzmetkerleri saǵat 19.00-de sýdan shyǵardy.
Sondaı-aq, keshe saǵat 19.11-de Oral qalasynda «Batys Qazaqstan mashına jasaý kompanııasy» AQ aýdanynda qutqarýshylar 44 jastaǵy er adamnyń denesin shyǵardy. Ol dosymen birge sýda júzip júrgende batyp ketken. Sosyn ony dosy Jaıyq ózeniniń arǵy betine shyǵaryp qoıǵan. Qutqarýshylar máıitti bergi betke shyǵaryp, polıtsııa qyzmetkerlerine tapsyrdy.
«Taǵy bir oqıǵa Aqjaıyq aýdany Jambyl aýyldyq okrýgi «Dóńgelek» sý qoımasynda boldy. 31 jastaǵy er adam 4 tamyz kúni saǵat 22.00-de qaıyqpen sýda júzip, belgisiz jaǵdaıda joǵalyp ketken. Qaıyq sýdan tabylǵan. 5 tamyz kúngi saǵat 10.42-de izdestirý jumystary bastalyp, onyń denesi búgin 07.50-de tabyldy. BQO TJ departamenti turǵyndarǵa sýdaǵy qaýipsizdik erejelerin qatań saqtaý kerektigin eske salady», dep habarlady vedomstvodan.
Buǵan deıin oblysta 6 adam sýǵa ketken bolatyn, olardyń bári de – eresekter.
Sońǵy kúnderi óńirde qatty ystyq bolyp tur.