Batys Qazaqstan oblysynda túrmeden shyqqan turǵyn kórshisin bopsalaǵan

ORAL. QazAqparat – Batys Qazaqstan oblysynda buryn sotty bolǵan turǵyn kórshisinen aqsha bopsalaǵan, dep habarlaıdy QazAqparat Polisia.kz saıtyna silteme jasap.

Shyńǵyrlaý aýylynyń buryn eki ret qylmystyq jaýapkershilikke tartylǵan turǵyny bostandyqqa shyqqannan keıin eski ádetin qaıta bastaǵan. Ol kólik jóndeý ortalyǵy ıesinen aqsha bopsalaǵan.

BQO PD uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalaryn júrgizý barysynda aýyl turǵynynyń qylmystyq is-áreketin áshkereledi.

Anyqtalǵanyndaı, 42 jastaǵy kúdikti 20 maýsym men 16 shilde aralyǵynda óziniń 34 jastaǵy kórshisine kúsh qoldaný arqyly qaýip tóndirip, jábirlenýshiden aqshalaı qarajat bopsalaǵan. Jeke tintý barysynda ustalǵan adamnan jábirlenýshiden alǵan 60 myń teńgesi, sonymen qatar erekshe ıisi bar qara-jasyl zaty bar qaǵaz býmasy jáne ORRO telefony tabylyp, tárkilendi. 42 jastaǵy kúdikti buryn qylmystyq jaýapkershilikke tartylyp, 18 jylǵa jýyq bas bostandyǵynan aıyrý oryndarynda otyrǵan. Belgili bolǵandaı, mundaı uzaq merzimge bas bostandyǵynan aıyrý tıisti nátıje bermeı, bostandyqqa shyǵyp, taǵy da qylmystyq jolǵa túsken. Atalǵan fakti boıynsha QR QK-niń 194-baby (Qorqytyp alý) boıynsha sotqa deıingi tergeý amaldary júrgizilip jatyr.