Batys Qazaqstan oblysynda «Syrym eli» gazetiniń 90 jyldyǵy atalyp ótti
Syrym aýdandyq mádenıet úıinde karantındik talaptarǵa sáıkes ótken sharada aıtylǵanyndaı, aýdanda baspasóz tarıhy Alashorda úkimetimen tyǵyz baılanysty.
Batys Alashorda qurylǵan kezde baspa isin uıymdastyrý aǵartýshy, aqyn ári dáriger Ahmet Mámetovke tapsyrylady. 1919 jyly baspahana quraldary satyp alynǵanymen, Jympıtyda gazet ashý múmkin bolmaıdy. Baspahana Oıylǵa kóshirilip, onda «Erkin qazaq» gazetiniń bir-eki nómiri shyǵyp, jabylyp qalady.
Tek 1920 jyly Jympıtyda Ahmet Mámetovtiń redaktorlyq etýimen «Erik» gazeti shyǵa bastaıdy. 1923 basylym Atyraýǵa kóshirilip, qazirgi Atyraý oblystyq «Atyraý» gazetiniń irgesi qalanady.
1930 jyly jaryq kórgen Jympıty (qazir Syrym) aýdandyq «Qyzyl tý» gazetiniń ataýy keıinnen «Qaınar», «Syrym eli» bolyp ózgerdi.
Aýdan ákimi Tólegen Tóreǵalıevtiń aıtýynsha, tarıhy baı aýdandyq gazetti 25-ten astam redaktor basqardy. Solardyń ishinde Qýan Tastaıbekov, Ǵubash Jóndibaev, Ǵalıasqar Qosanovtardy ataýǵa bolady.
Gazet basyna tóngen aýyr kúnder de bolǵan. 1973 jyly buldyrtylyq muǵalim Hasan Dabarovtyń Alashorda týraly maqalasy shyǵyp, soǵan baılanysty redaktor Ýálı Sultanov partııadan shyǵarylyp, qyzmetinen qýylady. Sodan keıin tizgindi belgili qalamger, Qazaqstan Jazýshylar odaǵynyń múshesi Baqtyǵul Oıshybaev aldy.
Ár kezeńde redaktorlyq etken Engels Shyńǵalıev, aqyn Mahmet Qajıahmetov mereıtoılyq sharanyń qurmetti qonaqtary qatarynda boldy.
Qazirgi tańda respýblıkaǵa tanymal jas aqyn Baýyrjan Shırmedınuly basshylyq etetin gazet kókeıkesti máselelerdi kóterip qana qoımaı, aýdannyń qoǵamdyq ómirine keńinen aralasyp keledi. Mysaly, «Gazetten jasalǵan úı» jobasy aıasynda úsh úıge gaz kirgizilse, muqtaj eki otbasyǵa baspana satyp alyndy. Sondaı-aq bıyl jazda indet órshigen tusta gazet kásipkerlerge úndeý tastap, sonyń nátıjesinde aýrýhana men naýqastarǵa der kezinde kómek kórsetildi.
Aýdandyq gazettiń mereıtoıy aıasynda óńirdegi aıtystyń alǵashqy qarlyǵashy atanǵan Jańyl Jurmaǵambetovanyń 95 jyldyǵyna oraı mektep oqýshylary men jastar arasynda oblystyq aıtys ótkizildi.
Oǵan qosa Qazaqstan Jýrnalıster odaǵynyń múshesi, «Syrym eli» gazetiniń jaýapty hatshysy Músirbek Aıtashevtiń Qazaqstan Jazýshylar odaǵy Batys Qazaqstan fılıalynyń (basshysy, aqyn Baýyrjan Halıolla) qoldaýymen jaryq kórgen «Júregime uıa salǵan qarlyǵash» atty kitabynyń tusaýy kesildi.
Aıta keteıik, «Syrym eli» - «Jaıyq Press» JShS medıaholdıngi shyǵaratyn 2 oblystyq, 12 aýdandyq gazettiń biri. Bıyl budan buryn Bókeı ordasy aýdandyq «Orda juldyzy» gazetiniń 90, Báıterek aýdandyq «Aýyl tynysy» gazetiniń 80 jyldyǵy atalyp ótilse, aldaǵy aptada Qaztalov aýdandyq «Aýyl aınasy» gazetine kezek tımek.