Batys Qazaqstan oblysynda stýdentterge tórt jataqhana salynady

ORAL. QazAqparat  - Memleket basshysynyń «Áleýmettik bes bastamasyna» sáıkes Batys Qazaqstan oblysyndaǵy oqý oryndary úshin keminde tórt jataqhana salynady. Bul týraly oblystyq máslıhattyń kezekti HVІ sessııasyna qatysqan óńir basshysy Altaı Kólginov málim etti, dep habarlaıdy QazAqparat tilshisi.

Óńir basshysynyń aıtýynsha, QR Bilim jáne ǵylym mınıstrligimen birlese otyryp, oblystaǵy JOO-lar janynan jataqhanalar salý kózdelýde. Bıyl qos birdeı jataqhana qurylysy bastalady. Sonymen qatar Oraldaǵy ındýstrıaldy kolledj janynan jataqhana salynady. Onyń jobalyq-smetalyq qujattamasyn jasaýǵa qajetti qarjy búgingi sessııada bólindi.

Aıta keteıik, oblystyq bıýdjet 20,2 mlrd teńgege naqtylandy. Sonyń ishinde 9,3 mlrd teńge «Nurly jer» baǵdarlamasyn júzege asyrýǵa baǵyttaldy. Bıyl 21 kópqabatty turǵyn úı salynyp, qajetti ınjenerlik kommýnıkatsııalar tartylmaq. Sol sekildi áleýmettik sala shyǵyndaryna 5 mlrd teńge, kóliktik ınfraqurylymdy damytýǵa 1 mlrd teńge qarastyryldy. Aýyl sharýashylyǵy, veterınarııa jáne qorshaǵan ortany qorǵaýǵa 388,6 mln teńge, turǵyn úı kommýnaldyq sharýashylyǵyna 437,6 mln teńge, sýmen jáne gazben qamtýǵa 315,3 mln teńge bólindi.

Atalǵan ózgeristerdi eseptegende, oblystyq bıýdjet kirister men shyǵystar boıynsha 126,1 mlrd teńgege jetti.