Batys Qazaqstan oblysynda perspektıvti aýyldar irikteldi
BQO strategııa jáne ekonomıkalyq damý basqarmasynyń basshysy Medet Aıdynǵalıevtiń Óńirlik kommýnıkatsııalar qyzmeti alańynda ótken brıfıngte málim etkenindeı, oblysta barlyǵy 416 eldi mekende 313,8 myń adam turady.
Onyń sózine qaraǵanda, «Aýyl – el besigi» jobasy aıasynda 223 perspektıvti aýyl (sonyń ishinde 78-i – tirekti, 35-i – strategııalyq mańyzdy shekara mańyndaǵy aýyldar) iriktelgen, bulardaǵy halyq sany – 277,1 myń adam.
Atalmysh joba aıasynda 2022 jyly aýyldardy jańǵyrtýǵa baǵyttalǵan 48 jobany júzege asyrýǵa 7,8 mlrd teńge bólindi
Bıyl jobalarmen 31 perspektıvti aýyl (82,7 myń adam) nemese aýyl turǵyndarynyń 27,4 paıyzy qamtyldy.
M.Aıdynǵalıevtiń aıtýynsha, kóliktik ınfraqurylym salasynda 19 jobaǵa 2,6 mlrd teńge qaraldy. 1 qarashadaǵy málimet boıynsha 2,1 mlrd teńge (94 paıyz) ıgerilip, Jánibek aýdanyndaǵy Jánibek, Kaztalovtaǵy Kaztalov, Jalpaqtal, Bórlidegi Bórli, Prıýral aýyldarynda 17,5 shaqyrym aýylishilik joldar jóndeldi.
Sol sekildi áleýmettik salada 27 jobaǵa berilgen 5,1 mlrd teńgeniń 3,3 mlrd teńgesi (66 paıyz) ıgerildi. Bul qarjyǵa aýdandardaǵy negizinen aýyldyq klýbtar men mektepter, sport nysandaryn jóndeý jumystary júrgizildi. Olardyń birqatarynda kúrdeli jóndeý jumystary jalǵasýda.
Abattandyrý salasynda Aqjaıyq aýdanyndaǵy eki kósheni jaryqtandyrýǵa 49 mln teńge jumsaldy.
Jobalardy júzege asyrý barysynda 307 jumys orny ashyldy.
«Aldaǵy jyly 28 perspektıvti aýylda 45 jobany júzege asyrý úshin 7,5 mlrd teńge (2,2 mlrd teńge – respýblıkalyq, 5,4 mlrd teńge – jergilikti bıýdjetten) qaralatyn bolady. «Aýyl – el besigi» jobasy aıasynda Memleket basshysynyń tapsyrmasyna sáıkes aýyldardyń áleýmettik jáne ınjenerlik ınfraqurylymyn jańartý baǵytyndaǵy jumystar jalǵasyn tabady», dedi basqarma basshysy.
Aıta keteıik, «Aýyl – el besigi» jobasy 2019 jyldan beri júzege asyrylyp keledi. 2019-2021 jyldary 59 jobaǵa 11,1 mlrd teńge baǵyttalyp, nátıjesinde 11 mektep, 8 mádenıet, 2 sport, 2 turǵyn úı-kommýnaldyq sharýashylyq nysany, 7,1 shaqyrym sý qubyry, 104 shaqyrym jol kúrdeli jóndelgen bolatyn.
Batys Qazaqstan oblysy boıynsha 2025 jylǵa deıin jańǵyrtylǵan tirekti aýyldar úlesin 100 paıyzǵa deıin jetkizý kózdelip otyr.