Batys Qazaqstan oblysynda 72 sábıge «Súıinshi» syıqoraby tabys etildi

ORAL. QazAqparat – Batys Qazaqstan oblysynda Táýelsizdiktiń 30 jyldyǵyna oraı 16 jáne 17 jeltoqsan kúnderi dúnıege kelgen 72 sábıdiń ata-anasyna Memleket basshysynyń atynan «Súıinshi» baby-bokstary tabys etildi, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy» KEAQ BQO fılıalynan málim etkenindeı, «Súıinshi» syıqorabyna bóbekterge qajetti zattardan basqa QR Prezıdenti Qasym-Jomart Toqaevtyń quttyqtaý haty, «Táýelsiz Qazaqstanǵa 30 jyl» estelik monetasy, balanyń týý týraly kýáligi salynǵan.

«Dúnıege kelgen balalarǵa týý týraly kýálikti alý týraly ótinimderdi HQO qyzmetkerleri qabyldap, ári qaraı Qazaqstan azamatynyń alǵashqy qujatyn resimdeý úshin AHAT organdaryna joldady. Demalys kúnderine qaramaı, AHAT qyzmetkerlerine týý týraly kýálikterdi resimdegeni, «Qazposhta» qyzmetkerlerine «Súıinshi» baby-bokstaryn ýaqtyly jetkizgeni, sondaı-aq barlyq medıtsına qyzmetkerlerine qajyrly eńbekteri úshin alǵys aıtqym keledi», dedi «Azamattarǵa arnalǵan úkimet» oblystyq fılıalynyń dırektory Nádir Qurymbaev.

«Súıinshi» syıqorabyn Jańaqala aýdanynyń turǵyndary Qaharman Zınýllın men Kámshat Esqaqova alǵashqylardyń biri bolyp aldy. Egizderdiń birine Tarǵyn, ekinshisine Torǵyn esimi berilgen.

Zınýllınder áýleti osyndaı qýanyshty sátterin bóliskeni úshin rızashylyǵyn bildirdi.

«Qazposhta» AQ BQO fılıaly dırektorynyń orynbasary Nurǵısa Qamashevtiń aıtýynsha, qazirgi ýaqytta bokstar Bórli, Jańaqala, Jánibek, Kaztalov, Syrym aýdandaryna joldanǵan. Keıbir analar syılyqtardy oblystyq perınataldyq ortalyqta alýda.