Batys Qazaqstan oblysynda 6 mektep karantınge jabyldy

ORAL. QazAqparat – Batys Qazaqstan oblysynda alty mektep karantınge jabyldy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaev Óńirlik kommýnıkatsııalar qyzmetinde ótken brıfıngide málim etkenindeı, bıylǵy tórtinshi toqsanda 1 sáýirden beri 293 oqýshydan koronavırýs anyqtalsa, sonyń 138-i dástúrli formatta, 155-i qashyqtan bilim alady.

Oqý jyl bastalǵannan beri indet tabylǵan oqýshylar sany 922-ge jetti.

Nurlybek Ermekulynyń sózine qaraǵanda, kúni búgin qala men aýdandardyń bas memlekettik sanıtar dárigerleriniń qaýlysymen 6 mektepke qosa 40 mekteptegi 69 synyp, 7 balabaqshada 7, 1 JOO-da 1, 2 orta arnaýly bilim berý uıymynda 2 top karantınge jabyldy.

Bıyl oblysta 8883, sonyń ishinde qańtarda – 1837, aqpanda – 1950, naýryzda – 2138, sáýirde 3884 adamnan koronavırýs anyqtaldy.

Sáýir aıynda KVI juqtyrǵandarmen qarym-qatynastaǵy 4294 adam medıtsınalyq baqylaýǵa alyndy.

Sońǵy aptada (22-28 sáýir) indet juqtyrý kórsetkishi aldyńǵymen (15-21 sáýir) salystyrǵanda, 7,2 paıyzǵa (1193-ten 1107-ge) tómendedi.

Sáýir aıynda aýyrǵandardyń 1370-i (35,2 paıyzy) – jumys isteıtinder, 975-i (25,1 paıyzy) – zeınetkerler, 908-i (23,3 paıyzy) – jumyssyzdar, 293-i (7,5 paıyzy) oqýshylar bolyp otyr.

Osy aıda 66544 (kúnine orta eseppen 2376) PTR test zertteýleri júrgizildi.

«Oblysta monıtorıngtik toptar sáýirde 634 reıd júrgizip, 3422 nysandy qamtydy. 34 nysannan sanıtarlyq talapty buzýshylyq anyqtaldy. 130 hattama toltyrylyp, 8,2 mln astam teńge aıyppul salyndy», dedi N.Mustaev.

Eske sala keteıik, budan buryn Batys Qazaqstan oblysynda bıyl 720 bala koronavırýs juqtyrǵanyn jazǵan bolatynbyz.