Batys Qazaqstan oblysynda 35 aýylǵa aýyzsý tartylýda
BQO qurylys basqarmasynyń basshysy Álibek Antazıevtiń málim etkenindeı, sonyń 11-i boıynsha jumystar 2021 jyly bastalsa, 24-i – jańa jobalar.
Atap aıtqanda, Aqjaıyq aýdanynda 1 (Chapaev aýyly), Kaztalovta 7 (Jańatań, Bespishen, Ordabasy, Jas, Ábish, Satybaldy, Orazǵalı), Qaratóbede 1 (Shalǵyn), Báıterekte 4 (Mahambet, Jańatań, Órken, Zelenyı), Terektide 4 (Talpyn, Abaı, Barbastaý, Magıstralnyı) jáne Syrymda 7 (Bulan, Jambyl, Alǵabas, Qaraǵandy, Qosoba, Jyraqudyq, Kózdiqara) joba júzege asyrylýda.
Á.Antazıevtiń sózine qaraǵanda, osy maqsatqa 7,4 mlrd teńge qarastyrylǵan.
«Ótken jyly qurylys nysandaryndaǵy qoǵamdyq baqylaý oń nátıje berdi. Bıyl da aýyl turǵyndary osy iske belsene aralasyp, ózderi kórgen buzýshylyqtar týraly habarlap otyrsa, jaqsy bolar edi. Jyl sońynda 26 eldi mekendi ortalyqtandyrylǵan sýmen qamtý josparlanýda. Sonda aýyl turǵyndaryn sýmen qamtý 92 paıyzǵa jetetin bolady», dedi Á.Antazıev.
Batys Qazaqstan oblysynda barlyǵy 416 eldi meken bolsa, ótken jyldyń aıaǵyna deıin sonyń 245-ine (283 myń adam) ortalyqtandyrylǵan sý kózi jetken edi. Jalpy, 2025 jylǵa deıin barlyq aýyldy sýmen qamtý kózdelip otyr.