Batys Qazaqstan oblysynda 2140 múgedek saılaýshylar tizimine engizildi

ORAL. QazAqparat – Batys Qazaqstan oblysynda 505 saılaý ýchaskesi 20 qarasha kúni ótetin prezıdent saılaýyna daıyn, dep habarlaıdy QazAqparat tilshisi.

BQO aýmaqtyq saılaý komıssııasynyń tóraǵasy Ǵaısa Qapaqov Óńirlik kommýnıkatsııalar qyzmeti alańynda ótken brıfıngide málim etkenindeı, oblystyq tótenshe jaǵdaılar departamenti barlyq ýchaskelerdi tekserýden ótkizip, qaýipsiz degen tujyrymdamalar tabys etildi.

Ǵaısa Hamıdollaulynyń sózine qaraǵanda, osy aptada barlyq ýchaskede daýys berýge arnalǵan kabınalar qoıylyp, saılaý komıssııalarynyń músheleri, baıqaýshylar otyratyn oryndar belgilendi, múgedektigi bar saılaýshylarǵa arnalǵan kerek-jaraqtyń bári ornalastyrylatyn bolady.

«Saılaýshylar tizimine múgedektigi bar 2140 adam engizildi, sonyń ishinde 510-y – arbamen júretinder, 1282-si – kórý, 348-i – estý qabileti nasharlar. Osy adamdardyń daýys berýine barlyq múmkindikti jasap otyrmyz», - dedi Ǵ.Qapaqov.

Sol sekildi oblysta jasy seksennen asqan 13 myńnan astam zeınetker (sonyń 7 myńǵa jýyǵy Oral qalasynda) bolsa, olarǵa da erekshe kóńil bólinedi. Densaýlyǵy jáne basqa jaǵdaıǵa baılanysty saılaý ýchaskesine kele almaıtyndarǵa ótinishteri boıynsha úılerinen daýys berýge múmkindik jasalady.

Ǵ.Qapaqovtyń aıtýynsha, saılaýǵa 3259 komıssııa múshesi tartylsa, bári de kásibı turǵyda daıyndyq kýrstarynan ótip, tıisti sertıfıkattaryn aldy. Bir aıta ketetin jaıt, saılaý komıssııasy múshesin máslıhattar óz sessııasynda daýys berý arqyly taǵaıyndaıdy. Oǵan deıin túrli saıası partııalar, qoǵamdyq uıymdar óz kandıdatýralaryn usynady.Usynylǵan kandıdat sol partııanyń nemese qoǵamdyq uıymnyń múshesi bolýy mindetti emes. Komıssııa múshesi bes jylǵa saılanady.

Oblys boıynsha 179 saılaý ýchaskesinde onlaın servıs qyzmeti jumys isteıtin bolady. Sondaı-aq 5 ýchaskede alǵash ret shaǵyn halyqqa qyzmet kórsetý ortalyǵy óz qyzmetin atqarady.

«Kúni búgin oblys boıynsha saılaýshylardyń 83 paıyzyna shaqyrý qaǵazy tabystaldy. Solardyń 77 paıyzy saılaýǵa keletindigin bildirdi. Saılaýshylardy yntalandyrý maqsatynda keıbir jerde jármeńke uıymdastyrylsa, alǵash ret daýys bergen, otbasylarymen, balalarymen kelgenderge syılyqtar qarastyrylǵan», dedi Ǵ.Qapaqov.

Eske sala keteıik, budan buryn Batys Qazaqstanda referendýmǵa oraı 444 myńǵa jýyq saılaýshy tirkelgenin jazǵan bolatynbyz.