Batys Qazaqstan oblysynda 21 blokpost jumys jasaıtyn bolady

ORAL. QazAqparat – Batys Qazaqstan oblysynda 1 mamyr kúni saǵat 00.00-den bastap 21 blokpost jumys jasaıtyn bolady. Bul týraly oblys ákimi Ǵalı Esqalıevtiń tóraǵalyq etýimen ótken óńirlik jedel shtab otyrysynda BQO polıtsııa departamentiniń bastyǵy, polıtsııa general-maıory Maqsothan Ablazımov málim etti, dep habarlaıdy QazAqparat tilshisi.

Onyń aıtýynsha, BQO bas memlekettik sanıtar dárigeriniń 26 sáýirdegi qaýlysyna sáıkes 21 blokpostyń jeteýi oblys ortalyǵynda, 14-i aýdandarda ornatylyp jatyr.

Sonyń ishinde Aqjaıyq, Báıterek, Bórli, Qaztalov, Terekti jáne Shyńǵyrlaý aýdandarynda 2-3 blokpostan qoıylmaqshy.

«Barlyq blokpostarda modýldar ornatylyp, qajetti qural-jabdyqtarmen qamtylady. Ár bekette polıtsııa departamenti basshylyǵy sapynan jaýapty adam bekitildi. Olar beket jumysyn uıymdastyryp, basshylyq etetin bolady.

Blokpostarda eki aýysymda 143 polıtsııa qyzmetkeri jumys jasaıdy, 21 qyzmettik avtokólik bólindi. Sonyń ishinde 68-i – Oral qalasy polıtsııa basqarmasynyń qyzmetkerleri. 7 kólik osy basqarmaǵa tıesili», dedi M.Ablazımov.

BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń málim etkenindeı, oblysta sońǵy sáýir aıynda indet órship ketkendikten, karantındik sharalar kúsheıtilip otyr.

Onyń sózine qaraǵanda, Reseıdiń 83 óńirinde sońǵy táýlikte 9284 adamnan koronavırýs anyqtaldy. Sonyń ishinde Batys Qazaqstanmen kórshiles Samara oblysynda – 176, Saratovta – 130, Orynborda – 67, Volgogradta 45 adamnan indet tabyldy. Epıdemıologııalyq jaǵdaı turaqsyz bolǵandyqtan, bul elde ishki lokdaýn jalǵasýda.

«Úndistanda koronavırýstyń órshýi búkil dúnıe júzin alańdatyp otyr. Sońǵy táýlikte bul elde 379 myńnan astam turǵynnyń aýyrǵany tirkeldi. ıAǵnı bizdegi bir qalanyń halqymen teń deýge bolady. Jalpy, indet juqtyrǵandar sany 18,3 mıllıonnan asty. Bir táýlikte 3645 adam kóz jumdy. Úndistandyq shtamnyń ereksheligi óte tez taralatyndyǵynda. Sondyqtan osyndaı jaǵdaıǵa jol bermes úshin shekteý sharalaryn qatańdatyp otyrmyz», dedi M.Aryspaev.

«1 mamyrdan bastap karantındik sharalardy kúsheıtýdegi maqsat – indettiń órshýin boldyrmaý. Osyny turǵyndar da túsinip, sanıtarlyq talaptardy saqtaýy qajet. Oblysta ótken jyly indet órshigen shilde aıynda kúnine 120-130 adamnan koronavırýs anyqtalsa, qazir 180-200-ge deıin jetip otyr. Sondyqtan barlyq saqtyq sharalaryn alýǵa tıistimiz», dedi oblys ákimi Ǵalı Esqalıev.

Eske sala keteıik, budan buryn Batys Qazaqstanda 1 mamyrdan bastap karantın kúsheıtilip, blokpostar qoıylatynyn, Oral qalasynda jazasyn óteýshiler koronavırýsqa qarsy ekpe saldyrǵanyn jazǵan bolatynbyz.

Sondaı-aq bıyl óńirde koronavırýs juqtyrǵandar sany 10 myńǵa jýyqtady.