Batys Qazaqstan qalamgerleri jyldy qorytyndylady

ORAL. QazAqparat – Qadyr Myrza Álı atyndaǵy oblystyq mádenıet jáne óner ortalyǵynda BQO qalamgerleri jyldy qorytyndylady, dep habarlaıdy QazAqparat tilshisi.

Jıyndy ashqan Qazaqstan Jazýshylar odaǵy BQO fılıalynyń dırektory, aqyn Baýyrjan Halıolla atqarylǵan jumystarǵa qysqasha sholý jasap, jańa jylda alda turǵan maqsat-mindetterdiń budan da aýqymdy ekendigin aıtty.

Oblys ákiminiń orynbasary Serik Egizbaev bıyl óńirde qazaqtyń aqıyq aqyndary, Qazaqstan halyq jazýshylary Juban Moldaǵalıev pen Qadyr Myrza Álıdiń mereıtoılary keń kólemde atalyp ótkenin, jazýshy pikiri qoǵam úshin qashanda mańyzdy ekendigin, sondyqtan birlesip is tyndyrsa, alynbaıtyn asý joqtyǵyn jetkizdi.

Qorytyndy is-sharaǵa Almatydan arnaıy kelgen Qazaqstan Jazýshylar odaǵy basqarma tóraǵasynyń orynbasary, belgili jazýshy Mereke Qulkenov fılıal dırektory Baýyrjan Halıollanyń az ýaqyt ishinde qolynan is keletinin kórsete bilgenin, óńirdegi qalamgerlerdiń moıny ozyq týyndylaryn respýblıka kóleminde nasıhattaı bilý kerektigin aıtty.

«Ádebıet barda rýh bar. Dostoevskıı aıtqandaı, álemniń barlyǵy ádebıetke kelip tireledi. Qaı jaǵynan qarasań da, ádebıetke tirelmeıtin eshteńe joq. Ádebıeti joq el eshkimge áser ete almaıdy. Eshkimge tárbıe bere almaıdy, eshkimge qoı dep basý aıta almaıdy. Myqty ádebıeti bar el ǵana alǵa basady», dedi Mereke Ábdeshuly.

Oral qalasynyń ákimi Abat Shynybekov Abaıdyń 175 jyldyǵyna oraı shahardaǵy bas dańǵyldyń birine uly aqynnyń esimi berilip, Abaı alańynyń kúrdeli jóndelip, qaıta jańǵyrǵanyna toqtaldy.

Jıyn barysynda Qazaqstan Jazýshylar odaǵyna jańadan qabyldanǵan aqyndar Uldaı Sarıeva, Talap Qýanysh, Qazbek Qabjanov, Talǵat Myqı jáne Aıbol Islamǵalıevke múshelik bıletteri tabys etildi.

Sondaı-aq bir top qalamgerlerge BQO ákimi Ǵalı Esqalıevtiń, Qazaqstan Jazýshylar odaǵy basqarma tóraǵasy Ulyqbek Esdáýlettiń alǵyshattary, «Abaı» mereıtoılyq medali, Qazaqstandyq salalyq mádenıet, sport, týrızm jáne aqparat qyzmetkerleri kásiptik odaǵynyń marapattary tapsyryldy.

Aqyn, Qazaqstan Jazýshylar odaǵynyń múshesi Aıtqalı Nárikovtiń 80 jasqa tolýyna oraı uıymdastyrylǵan «Aq Jaıyqtyń Aıtqalıy» atty jyr músháırasynyń bas júldesi jas aqyn Marlen Ǵılymhanǵa berildi.