Batys Eýropa – Batys Qytaı dálizinen jyl saıyn qansha tabys túsedi

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi QazAqparat tilshisine Batys Eýropa-Batys Qytaı avtomobıl dálizinen jyl saıyn el bıýdjetine qansha tabys túsetinin aıtty.

Mınıstrliktiń dereginshe, atalmysh qurlyqaralyq dálizdiń jalpy uzyndyǵy – 8445 shaqyrym.

«Batys Eýropa – Batys Qytaı» transkontınentaldyq dálizi 3 memlekettiń aýmaǵymen ótedi. Olar: Qytaı-Qazaqstan (25%), Qytaı-Ortalyq Azııa (35%) jáne Qytaı-Qazaqstan-Reseı-Batys Eýropa (40%). Halyqaralyq jol osy aımaqtar boıynsha júk tasymaldaýdy qamtamasyz etedi», - delingen mınıstrliktiń málimetinde.

2019 jyldyń alǵashqy 5 aıynda atalǵan dáliz arqyly 650 myń tonna tranzıttik júk ótken eken.

«Búginde dálizdiń ortasha jyldyq tıimdiligi - shamamen 195 mlrd teńge. Bul kórsetkish jyldan-jylǵa ósýde. 2018 jyldyń qorytyndysy boıynsha Qazaqstan arqyly ótken tranzıttik júktiń kólemi - 1,637 mln tonna. Onyń 90 paıyzy osy Batys Eýropa-Batys Qytaı avtomobıl dálizine tıesili. Naqtyraq aıtsaq, dáliz arqyly 1,47 mln tonna júk tasymaldanǵan», - deıdi mınıstrlik ókilderi.