«Batys Eýropa-Batys Qytaı» dálizine qatysty kelisimge sáıkes ekinshi transh boıynsha 187 mln. dollar qarjy tartylady

aýryzdyń 4-i. QazAqparat /Qanat Mámetqazyuly/ - Búgin QR Parlamenti Senaty Qarjy jáne bıýdjet komıtetiniń keńeıtilgen otyrysy bolyp ótti. Onda komıtet músheleri «Qazaqstan Respýblıkasy men Azııa Damý Banki arasyndaǵy Qaryz týraly kelisimdi (1 kólik dálizi-Jambyl oblysyndaǵy ýchaskeler - «Batys Eýropa-Batys Qytaı» halyqaralyq tranzıt dálizi-Investıtsııalyq baǵdarlama - 2 joba) ratıfıkatsııalaý týraly» zań jobasyn talqylady,

dep habarlaıdy QazAqparat.
«2009 jylǵy jeltoqsannyń 3-inde qol qoıylǵan osy Kelisimniń maqsaty avtojoldar jelisin qaıta jańartý men damytý jáne joldy paıdalaný qyzmetteriniń keshenderin jańalaý úshin qaryz tartý bolyp tabylady. Bul rette qaryz týraly kelisimniń ekinshi transhyna sáıkes, tartylatyn qarajat somasy 187 mln. dollardy quraıdy. Kelisim sheńberindegi zaem Jambyl oblysyndaǵy uzaqtyǵy 79 shaqyrym bolatyn tsement-beton jamylǵyly ýchaskesine qaıta jańartý jumystaryn qarjylandyrýǵa baǵyttalady. Qaryz berý sharttary boıynsha stavka - 0,2 paıyzdy, mindettemelik komıssııa -0,15 paıyzdy quraıdy», dedi zań jobasy boıynsha baıandaǵan Qarjy vıtse-mınıstri Berik Sholpanqulov. Bul rette Qazaqstan Respýblıkasy Úkimetiniń qosa qarjylandyrýy 33 mln. dollarynan aspaıtyn bolady.

Kelisimdi júzege asyrý elimizdiń kólik áleýetin damytyp, halyqaralyq tranzıt dáliziniń qazaqstandyq bóligindegi qozǵalys jıiligin eleýli arttyrady jáne tranzıttik júkterdiń aınalymyn ulǵaıtady dep kútiledi.

Komıtet músheleri zań jobasyn palatanyń jalpy otyrysyna shyǵarý týraly kelisti.