«Batys Eýropa - Batys Qytaı» avtojolynyń Ońtústik Qazaqstan oblysyndaǵy bóliginde qurylys jumystary shilde aıynda bastalady
Bul týraly QazAqparat tilshisine QR Kólik jáne kommýnıkatsııa mınıstrliginiń Ońtústik Qazaqstan oblysy boıynsha departamentiniń dırektory Berik Jaltyqbaev aıtty.
Onyń aıtýynsha, Ońtústik Qazaqstan oblysymen respýblıkalyq mańyzy bar 786 shaqyrym jol ótedi. «Bunyń 454 shaqyrymy «Batys Eýropa - Batys Qytaı» jobasy aıasynda qaıta jóndelip, qaıta jasalyp, jóndeýden ótedi. Buǵan jalpy quny 242,2 mıllıard teńge jumsalmaq. Qazirgi kezde joba aıasynda jóndeletin joldar jeti lotqa bólingen. Bunyń ishindegi 6 lot boıynsha 30-shy maýsymda tenderlik konvert ashylyp, merdigerler anyqtalady. Joldyń barlyǵy birinshi sanatta, ıaǵnı bir baǵytta eki jolaqty bolyp salynady», deıdi Berik Jaltyqbaev. Onyń aıtýynsha Tashkent - Shymkent- Jambyl oblysy shekarasy aralyǵyndaǵy jol konfessııalyq, ıaǵnı aqyly jol bolady. Onyń uzyndyǵy 209 shaqyrym. Buǵan joba aıasynda 127,7 mıllıard jumsalmaq.
Berik Jaltyqbaevtyń aıtýynsha, joldardyń qurylymy eki túrli bolady. Birinshisi, tsement-beton joldardyń ár qaısysy 35, 18, 27 santımetrli úsh qabattan turady. Al, asfaltti betondy joldar 30,20,15,10 jáne 5 santımetrli bes qabattan quralady. Bul joba aıasyndaǵy barlyq standarttarǵa sáıkes keledi.
Onyń aıtýynsha, Ońtústik Qazaqstan oblysy boıynsha «Batys Eýropa - Batys Qytaı» jolyn júzege asyrýǵa 2,1 mıllıon tekshe metr tsementti-beton, 5,2 mıllıon tekshe metr qıyrshyq tas, 2,1 mıllıon tekshe metr qum, 6,8 mıllıon tekshe metr shaǵyl tas, 1,1 mıllıon tonna tsement, 76 myń tonna bıtým, 1,2 mıllıon tonna asfaltti-beton jumsalmaq.