Batys aımaq boıynsha úzdik sardarlar anyqtaldy

ORAL. QazAqparat - QR Ulttyq ulany «Batys» óńirlik qolbasshylyǵynyń sardarlary arasynda úzdikter anyqtaldy, dep habarlaıdy «QazAqparat» tilshisi.

«Batys» óńirlik qolbasshylyǵynyń baspasóz qyzmetinen túsken málimetke qaraǵanda, baıqaýǵa Atyraý, Aqtóbe, Oral jáne Aqtaý qalalaryndaǵy alty áskerı bólimnen iriktelip kelgen 25 sardar qatysty. Olar eki kún boıy memlekettik til, qyzmettik-áskerı taktıkany qoldaný, jalpy áskerı jarǵy jáne basqa pánder boıynsha óz daıyndyqtarynyń qandaı deńgeıde ekendigin kórsetti. Mysaly, Makarov tapanshasymen nysana kózdeýden 5517-áskerı bóliminen (Oral) aǵa leıtenant Danııar Tursynov ozyq nátıjesimen daralansa, dene daıyndyǵynan 6655-áskerı bóliminen (Aqtóbe) kelgen kapıtan Aslan Nurǵazıev alda boldy.

 

Jıyn barysynda sardarlarmen «Batys» óńirlik qolbasshysy, general-maıor Álibek Serálıev qatysýshylarmen kezdesip, sardarlardyń qaraýyndaǵylarǵa árdaıym úlgi kórsete bilýi kerektigin jetkizdi.

 

Baıqaý qorytyndysynda 5517-áskerı bólimi jedel maqsattaǵy batalonynyń komandıri, maıor Marat Nurmuratov «Úzdik batalon komandıri», 5546-áskerı bóliminen (Atyraý) kelgen kapıtan Jandos Dospanov «Batalonnyń úzdik shtab bastyǵy», osy bólimnen aǵa leıtenant Sherzod Ismaılov «Úzdik rota komandıri», 5517-áskerı bóliminen aǵa leıtenant Danııar Tursynov «Úzdik tárbıeshi», leıtenant Almat Esjanov «Úzdik vzvod komandıri» atandy. 

 

Jeńimpazdar dıplomdarmen, baǵaly syılyqtarmen marapattalyp, aldaǵy jyly qańtarda Astanada ótetin baıqaýdyń fınaldyq kezeńine joldama aldy.