Batyrlardyń esimin elimizdiń shekara zastavalaryna berý usynyldy
«Elbasy óziniń «Bolashaqqa baǵdar: rýhanı jańǵyrý» atty baǵdarlamalyq maqalasynda: «Jańa turpatty jańǵyrýdyń eń basty sharty - ulttyq kodyńdy saqtaı bilý. Onsyz jańǵyrý degenińizdiń qur jańǵyryqqa aınalýy op-ońaı», - dep atap kórsetti. Bizdiń batyr babalarymyz aýmaǵy jóninen álemde toǵyzynshy oryndy alatyn, o sheti men bu shetine qulan jortsa tuıaǵy tozatyn, qyran ushsa qanaty talatyn ulan-ǵaıyr jerdiń shebin ǵasyrlar boıy qanyn tókse de, aryn tókpesten, janqııarlyqpen qorǵady. Búgingi beıbit zamanda Uly Dalamyzdyń shebin qorǵaýshy jaýynger-shekarashylar da sol batyr babalarymyzdyń búgingi býyny bolyp tabylady. Búginde 5 memleketpen shektesetin jáne jalpy uzyndyǵy 15 myń shaqyrymdaı bolatyn shekaramyzda 300-ge jýyq shekara zastavasy qurylǵan. Osy zastavalarǵa san taraptan suqtanǵan jat jurtqa Atamekenniń qarys qadamyn da ustatpaı, urpaǵyna tolyq mıras etken batyr babalarymyzdyń atyn bersek, oryndy bolar edi»,-dep toqtaldy Májilis depýtaty Baqytbek Smaǵul Úkimet basshysynyń orynbasary Erbolat Dosaevqa joldaǵan depýtattyq saýalynda.
Onyń paıymynsha, osyndaı qadamnyń ulaǵatty úlgisi bar.
«2017 jyldyń 3 sáýirinde qabyldanǵan №157-shi Úkimet qaýlysyna sáıkes, Ózbekstanmen aramyzdaǵy shekaradaǵy Qyzylorda shekara otrıadynyń 2019-shy áskerı bóliminiń «Qyzylqum» shekara zastavasy Janqoja batyrdyń atymen qaıta ataldy. Osynyń aldynda, 2014 jyly Qyzylorda oblysynyń Qazaly aýdanynda ótken, Janqoja Nurmuhammedulynyń 240 jyldyǵyna arnalǵan respýblıkalyq aýqymdaǵy is-shara barysynda Qyzylqumdaǵy shekara beketine batyrdyń esimin berý bastamasyn kótergen bolatynmyn. Bul bastama júzege asty jáne bul Qazaqstannyń Shekara qyzmeti quramyndaǵy onynshy ataýly zastava bolyp otyr.Bul birinshiden, el shebi men ulttyq qaýipsizdikti qorǵaýshy shekarashylarymyzdy darhan dalaǵa qalqan bolǵan batyr babalardyń uly rýhynda, Máńgilik eldiń maqsat-muratynda tárbıeleýge úles qosady. Ekinshiden, Qazaqstan tarıhynda erekshe oryn alar tulǵalardyń atyn máńgi qaldyrýǵa qyzmet etedi. Úshinshiden, Elbasy rýhanı jańǵyrýdyń «Týǵan jer» baǵdarlamasy aıasynda usynǵandaı, bul «esimderi el esinde saqtalǵan birtýar perzentteri» arqyly jas urpaqtyń týǵan jer tarıhyn tanýyna yqpal jasaıdy», - deıdi depýtat.
Onyń sózine qaraǵanda, batyr babalar atymen atalǵan shekaralyq zastavalar - ózge memleketter azamattaryna Qazaqstandy áz tarıhyn jáne er ulandaryn ulyqtaıtyn, umytpaıtyn, solardyń bıik rýhymen rýhtanatyn ór ári órkendi el retinde kórsetip turady. Bul bastama metsenattardy shekaralyq zastavalarǵa kómek kórsetip, qamqorlyq jasaýǵa tartýǵa jol ashady. Óıtkeni shekarashylar óz qyzmeti úshin qajettiniń barlyǵymen qamtamasyz etilgenimen, shekaralyq zastavalardyń kóbi keńes zamanynda turǵyzylǵan jáne materıaldyq-tehnıkalyq bazasy toza bastaǵan.
«Qurmetti Erbol Asqarbekuly, joǵaryda aıtylǵandy eskere otyryp, endi Bógenbaı, Qabanbaı, Qarasaı, Naýryzbaı, Er Jánibek, Raıymbek, Jalańtós Bahadúr jáne basqa da baıyrǵydan bergige deıingi batyrlarymyzdyń esimderin elimizdiń ár óńirindegi shekara zastavalaryna berý máselesin qarastyryp, tıisti nusqaý berýińizdi suraımyn. Qazaqstannyń ejelgi jáne keıingi tarıhyndaǵy uly tulǵalardy ulyqtaý ulttyq sanany jańǵyrtýǵa baǵyttalǵan mańyzdy qadamǵa aınalary anyq», - dedi Baqytbek Smaǵul.