«Batyrdyń arýaǵyn mazalamaıyq» - baspasózge sholý
***
Keshe Ázerbaıjannyń Gabala qalasynda túrkitildes memleketter yntymaqtastyq keńesiniń (Túrki keńesi) úshinshi sammıti ótti. Sammıtke Qazaqstan Prezıdenti Nursultan Nazarbaev, Ázerbaıjan Prezıdenti Ilham Álıev, Túrkııa Prezıdenti Abdýlla Gúl, Qyrǵyzstan Prezıdenti Almazbek Atambaev jáne Túrkimenstan Mınıstrler kabıneti Tóraǵasynyń orynbasary Sapardýrdy Toılıev qatysty. Osy jıyn arqaý bolǵan maqala «Egemen Qazaqstan» gazetiniń búgingi sanynda «Túbi birdiń tilegi bir» degen taqyryppen jaryq kórdi. Sammıt barysynda sóz alǵan Qazaqstan Prezıdenti Nursultan Nazarbaev túrkitildes memleketter basshylarymen Túrki keńesiniń úshinshi sammıtinde kezdeskenine qýanyshty ekenin jetkize kele, Ilham Álıevke ózderine kórsetilgen ystyq yqylasy men qonaqjaılylyǵy úshin rızashylyǵyn bildirgen. «Búginde Túrki keńesi aıasy keńeıgen tanymal halyqaralyq uıymǵa aınaldy. Uıym ekonomıkalyq, mádenı-gýmanıtarlyq baılanystardy nyǵaıtýǵa eleýli úles qosyp keledi. Ózara yntymaqtastyq pen birliktiń artýy «Túrki álemi» atty ortaq brendti jer-jahanǵa tanytyp otyr. Men endi Sizdermen Keńes qyzmetiniń búgini men bolashaǵyna qatysty oı bóliskim keledi. Biz Túrki keńesiniń bedelin arttyrý úshin onyń Uıym retindegi ınstıtýttyq negizin qalyptastyrýǵa bar kúshimizdi jumsaýymyz qajet. Osyǵan qatysty keıbir mańyzdy qujattardy ratıfıkatsııalaýdy tezirek aıaqtaǵan jón», - deıdi Memleket basshysy.
Kez kelgen memlekettiń bastaý alar núktesi - memlekettik shekara. Eldiń tynyshtyǵy memlekettik shekaranyń berik kúzetilýimen tikeleı baılanysty. 1992 jyldyń 18 tamyzynda Qazaqstan Respýblıkasynyń Prezıdenti N.Á.Nazarbaevtyń Jarlyǵymen shańyraq kótergen UQK Shekara qyzmeti osy jyldar aralyǵynda talaı belesterdi artqa tastady. Mereke qarsańynda «Egemen Qazaqstan» gazetiniń tilshisi QR UQK Tóraǵasynyń orynbasary - Shekara qyzmetiniń dırektory, general-leıtenant Nurlan Jolamanovpen kezdesip, shekarashylardyń búgingi tynys-tirshiligi jaıly suhbattasqan. Ekeýara áńgime barysynda ózine qoıylǵan barlyq saýalǵa tuşymdy jaýap bergen ol: «Aýrýyn jasyrǵan óledi», demekshi, shekara qurylymdaryndaǵy biraz kemshilikter anyqtaldy. Kóptegen basshy quramdaǵy ofıtserler ózderiniń tikeleı mindetterine salǵyrt qaraıdy. Shekarashy sekildi asqan jaýapkershilik júgin arqalaǵan mamandyq ıesine óz qyzmetine júrdim-bardym qaraý múldem jaraspaıdy. Myna derekke nazar aýdaraıyn, Shekara qyzmetiniń jeke quramynyń sany Qarýly Kúshterden eki ese az. Biraq, oryn alǵan quqyq buzýshylyq Qarýly Kúshterdegi jaǵdaımen birdeı. Bul - dabyl qaǵarlyq jaǵdaı edi. Áskerı salanyń negizgi tiregi - tártip. Tártibi aqsaǵan ondaǵan áskerı qyzmetshimen qosh aıtystyq. Onyń arasynda ofıtserler de, kelisimshart negizindegi qyzmetkerler de bar. Bul jumystar júıeli túrde jalǵasa beredi», - deıdi. Suhbat «Shekara qaýipsizdigi - turaqty damý kepili» degen taqyryppen berilgen.
***
«Birikken Ulttar Uıymynan jaqsy habar jetti: jahandyq osynaý uıymnyń Hatshylyǵy «Qazaqstan bolashaǵynyń turaqty energetıkasynyń 2050 jylǵa deıingi strategııasy» Tujyrymdamasyn maquldady», - dep jazady «Aıqyn» gazeti «BUU Qazaqstan tujyrymdamasyn qabyldady» degen taqyryptaǵy maqalasynda. Osylaısha, elimizdiń kezekti bastamasy jahandyq deńgeıde qoldaý taýyp otyr. BUU Hatshylyǵy men BUU Bas hatshysynyń keńsesi ǵasyr ortasyna deıingi ulttyq energetıkalyq strategııasyn ázirleý týraly Qazaqstannyń sheshimin quptaı otyryp, onyń álem elderine úlgi bolaryna senim bildiripti. Óıtkeni bul qujat ornyqty energetıka salasyndaǵy álemdegi tuńǵysh ulttyq strategııalardyń biri bolǵaly tur. Jańa turpatty Tujyrymdama jobasy bıyl ótken VI Astana ekonomıkalyq forýmy aıasyndaǵy arnaıy sessııa barysynda talqylanǵan bolatyn. AEF uıymdastyrý komıtetiniń dereginshe, bul joba elimizdiń «jasyl ekonomıkaǵa» kóshýi úshin turaqty energetıka salasyndaǵy qazaqstandyq bastamalardy toptastyrýǵa baǵyttalǵan. Bul qujattyń, sondaı-aq ıdeologııalyq, ımıdjdik mańyzy bar: ol eldiń ekologııalyq taza, tabıǵatqa zııan keltirmeıtin «bolashaq energııasyna» shyn berilgendigin pash etedi. Bul yqylas-nıetin Qazaqstan jer-jahanǵa «EKSPO-2017» kezinde kórnekti ári keńinen kórsetpek.
Osy basylymnyń jazýynsha, Reseıdiń buqaralyq aqparat quraldary erligi áldeqashan moıyndalyp, álemge aty ańyz bolyp taraǵan Álııa Moldaǵulovanyń asyl súıegi Monakovada joq eken degen habar taratty. Ol naqty faktilerge negizdelgen joq. Eshbir muraǵattyq qujattarǵa, zertteý jumystaryna súıenbeı-aq tep-tegis jerden osyndaı áńgime shyqty. Sol jerdegi batyrǵa ornatylǵan eskertkishtiń astynda batyr qyzdyń súıegi joqtyǵyn aıtyp, jerden jeti qoıan tapqandaı orys gazetteri jar saldy. «Bizdiń biletinimiz, bul habar shyqqan kezde oǵan qazba jumystary júrgizilgeni týraly aıtylǵan joq. Tipti solaı bolǵan kúnniń ózinde de, Álııanyń súıegi sol mańda jerlengendigin, týysqandar zıratyna arnalǵan eskertkishtiń odan keıin ornatylǵany eskerilmedi. Batyr qyzdyń súıeginen góri, olardy eskertkishtiń astynda bolmaǵany qyzyqtyratyn sııaqty», - dep jazady avtor. Maqala «Batyrdyń arýaǵyn mazalamaıyq» degen taqyryppen berilgen.