Batyr Júkembaevtyń AQSh-taǵy ekinshi jekpe-jegi ótetin kún belgili boldy

ASTANA. QazAqparat – Birinshi jartylaı orta salmaqtaǵy qazaqstandyq boksshy – Batyr Júkembaev (20-1, 16 KO) rıngke oralatyn kúnin belgiledi, dep habarlaıdy QazAqparat Sports.kz-ke silteme jasap.

BoxRec.com saıtynyń aqparaty boıynsha, Júkembaevtyń kelesi aıqasy 20 qyrkúıekte AQSh-tyń Florıda shtatyndaǵy Plant-Sıtı qalasynda ótedi dep josparlanǵan. Qarsylasynyń esimi áli jarııalanbady.

Batyr úshin bul jekpe-jek 2021 jyly AQSh-taǵy debıýtinen keıingi ekinshi aıqas bolmaq. Sol kezde ol mansabynda alǵash ret jeńilgen. Sodan keıin Batyr Qazaqstan men Kanadada bir-bir jekpe-jek ótkizdi.

Júkembaevtyń keıingi judyryqtasýy 2022 jyldyń 24 jeltoqsanynda Almatyda ótti. Ol Ońtústik Afrıka ókili Ksolanı Mkothelıdi (19-8, 12 KO) altynshy raýndta nokaýtqa jibergen bolatyn.