Batýt qaýipsizdigi jergilikti atqarýshy organdarǵa júkteledi

NUR-SULTAN. QazAqparat - Qazaqstanda balalar attraktsıondarynyń jumysyn retteý erejesi ázirlenip jatyr. Bul týraly búgin QR ІІM tótenshe jaǵdaılar komıtetiniń basshysy Vladımır Bekker aıtty, dep habarlaıdy QazAqparat tilshisi.

«Senbi kúni Prezıdent Ákimshiliginiń basshysy Іshki ister, Indýstrııa jáne ınfraqurylymdyq damý mınıstrlikteri, ulttyq palata ókilderi jáne kásipkerlerdiń qatysýymen jıyn ótkizdi. Bir aptanyń ishinde Indýstrııa jáne ınfraqurylymdyq damý mınıstrliginiń erejesin ázirleýge tapsyrma berildi. Biz óz usynysymyzdy ázirledik, jumys tobynyń quramyna kirdik. Ulttyq kásipkerler palatasyna bul erejeni sońyna deıin aıaqtaý tapsyryldy», - dedi ol Úkimet otyrysy aıasynda uıymdastyrylǵan brıfıngte.

Onyń atap ótýinshe, attraktsıondardy paıdalanýǵa baqylaý jasaý jergilikti atqarýshy organdarǵa júkteletin bolady.

«Keden odaǵynyń tehnıkalyq reglamenti bar. Onda onyń (battýttyń) qaıda jáne qalaı ornalastyrylýy kerektigi naqty jazylǵan. Indýstrııa jáne ınfraqurylymdyq damý mınıstrligi erejeni ázirleıdi. Negizinen ol tehnıkalyq reglamentte kórsetilgen talaptardy qamtıdy jáne oryn alǵan jaǵdaıdy eskere otyryp qosymsha talaptar bolady», - dedi V.Bekker.

Esterińizge sala keteıik, 26 mamyr kúni Qaraǵandydaǵy ortalyq mádenıet jáne demalys saıabaǵynda batýt aýdarylyp qalǵan bolatyn. Oqıǵa saldarynan 11 jasar bala kóz jumdy. Oqıǵaǵa baılanysty qylmystyq is qozǵaldy. Sońynan batýtty durys ornatpaǵan azamat qamaýǵa alyndy.