«Batpaqqa batyp qaldyq»: ShQO-da aýylishilik jol sapasyz jóndelgen

<p>Shyǵys Qazaqstan oblysy Kúrshim aýdany Terektibulaq aýylynda kólik joly sapasyz jóndelgen. Alǵashqy jańbyr jaýysymen-aq mı batpaqqa aınalyp, birinen keıin biriniń kóligi batqasyn turǵyndar <a href="https://kaz.inform.kz/" target="_blank" rel="noopener">QazAqparat</a> tilshisine habarlasyp, shaǵymdaryn jetkizgen-di.</p>

Aýyl turǵynynyń aıtýynsha, Jabaev kóshesinen Sarqytbaev kóshesine deıingi jol bıyl jazda jóndelgen. Alaıda, jóndeý júrgizgen merdiger kompanııa qıyrshyq tastyń ornyna sary topyraq pen qum tógipti.

«Onyń ústine sýaǵar da jasamaǵan. Alǵashqy jańbyr jaýa sala jolymyz batpaqqa aınalyp ketti. Kólikter arly-berli óte almaı, qaıta-qaıta batyp qalyp, júrgizýshiler bir-birleriniń kólikterin súırep, áreń shyǵardy», - dedi Qamash esimdi turǵyn. 

Anyq-qanyǵyn bilý úshin Kúrshim aýdanynyń ákimdigine habarlastyq. Ákimdik málimeti boıynsha, búginde Terektibulaq aýylynda 338 adam turady. Osy jyly eldi mekendegi Ýálıhanov, Abaı, Sarqytbaev jáne Jabaev kósheleri jóndeýden ótken.

«Terektibulaq aýylynyń kóshelerine ortasha jóndeý jumystaryn júrgizý úshin «Aýyl – el besigi» baǵdarlamasy boıynsha 50 mln teńge bólindi. Memlekettik satyp alýǵa qatysqan «Óskemen Tazalyq» JShS baǵany 43 mln teńgege túsirip, konkýrsty utyp aldy. Aýyl turǵyndarynan joldyń sapasyna qatysty ákimdikke shaǵym túsken joq. Alaıda, merdigermen jasalǵan kelisimshartqa sáıkes, joldyń buzylǵan jerleri qalypqa keltiriledi», - dep jaýap berdi aýdan ákimdiginen.

«Joldyń buzylǵan jerleri qalypqa keltiriledi». Ákimdiktiń osy ýádesiniń oryndalýyn kútip, birneshe kún ótkennen keıin aýyl turǵyndarynan habar aldyq.

«Sizderge aıtqannan keıin másele sheshildi. Aýyl ákimi men joldy jóndegen kompanııa ókilderi keldi. Jolǵa qıyrshyq tas tósedi. Qazir kólikter batpaıdy. Sý ótkizgish qubyrlar da ornatylatynyn aıtty. Kóp rahmet!» - dedi turǵyndar.  

 

Foto: Terektibulaq aýyly turǵyndarynan