Batysqazaqstandyq sportshy qol kúresinen álem chempıony atandy
Qol kúresinen BQO quramasynyń aǵa jattyqtyrýshysy Murat Ibatovtyń málim etkenindeı, aıtýly dodaǵa álemniń 61 elinen 1500-den astam sportshy qatysyp, baq synady.
Batysqazaqstandyq qol kúresi sheberi Janna Qaztýǵanova áıelder arasynda 55 kelige deıingi salmaqta top jardy.
Janna jarys barysynda asa azýly qarsylastaryn qapy qaldyrdy. Alǵashqy beldesýinde ýkraın qyzymen kezdesip, aılasyn asyrdy. Sodan keıin japonııalyq Aıana Takenakaǵa byltyrǵy ketken esesin qaıtaryp, bir qýantty. Sosyn rýmynııalyq Andrea Dobrynııanyń meselin qaıyrdy. Túrkııalyq Esra Kırazben jekpe-jekte joǵary tartý ádisin júzege asyra almady. Degenmen jartylaı fınalda A.Takenakany qaıtadan utty.
«Fınalda álemniń 11 dúrkin chempıony E.Kıraz qaıta tap keldi. Oǵan arnaıy daıyndaǵan ádis-tásilimizdi qoldandyq. Sońǵy básekede Esrany eki ret utyp, jeńiske jettik. Jarysqa daıyndalý kezinde Janna 12 keli salmaq qýǵan edi, sondyqtan óte qıyn boldy. Biraq kózdegen nátıjemizge qol jetkizip, Janna oblys tarıhynda alǵash ret qol kúresinen álem chempıony atandy. Shet jerde qazaqtyń týyn jelbiretip, ánuranyn shyrqatqanymyzǵa óte qýanyshtymyz», dedi M.Ibatov.
Onyń aıtýynsha, Qazaqstan quramasy komandalyq esepte eresekter jáne jasóspirimder arasynda birinshi orynǵa ıe boldy.
Bozbalalar men qyzdar arasynda batysqazaqstandyqtar Beıbarys Naýryzǵalı (70 kg), Sultan Ádiljanuly (+70 kg) jáne Kórkem Syrym (65 kg) kúmis, Alınýra Maratova (55 kg) qola júldege qol jetkizdi. Bul sportshylardy daıyndaýǵa jattyqtyrýshylar Esenaman Bekbolsynov, Mıras Jaımanov, Janna Qaztýǵanova, Muratbek Amanovtar atsalysty.