Batys Qazaqstannyń eki aýdanynda balyq qyryldy

<p>ORAL. KAZINFORM — Jaıyq-Kaspıı oblysaralyq basseındik balyq sharýashylyǵy ınspektsııasy Batys Qazaqstan oblysynyń Aqjaıyq jáne Báıterek aýdandarynda balyq qyrylǵanyn rastady. </p>

31 shildede Batys Qazaqstan oblysy ákimdiginen Aqjaıyq aýdany Orlov eski arnasynda balyq qyrylǵany týraly aqparat túsken. 

Inspektsııa búkil múddeli memlekettik organdarǵa (Batys Qazaqstan oblysynyń tabıǵı resýrstar basqarmasy, BQO boıynsha ekologııa departamenti, ǵylymı-óndiristik ortalyq) habarlaǵan.

«Osy aqparatty tekserý úshin joǵaryda atalǵan memorgan ókilderinen turatyn komıssııa balyq qyrylǵan arnaǵa jolǵa shyqty. Oqıǵa ornyna kelgennen keıin balyqtyń qyrylýy týraly aqparat rastaldy» deıdi mekemeden.

Qyrylǵan balyqtyń túri — tuqy. Jalpy salmaǵy — 21 keli. 

Oblystyq ekologııa departamenti zerthanalyq zertteý úshin sýdan synama aldy.

 Balyqtardyń qatty ydyraýyna baılanysty odan synama alý múmkin bolmady.

«Jergilikti atqarýshy organdarmen birlesip, sanıtarlyq normalardy saqtaı otyryp, qyrylǵan balyqty jınaldy» delingen habarlamada. 

Sonymen qatar Batys Qazaqstan oblysy Báıterek aýdany Gorbýnova aýylynda da bólinip qalǵan jaıylma sýda balyq qyrylǵan. 

Foto: Jaıyq-Kaspıı oblysaralyq basseındik balyq sharýashylyǵy ınspektsııasy

Munda negizinen móńke balyǵy qyrylǵan. Jalpy salmaǵy — 15 keli (salmaǵy 50-150gr).

BQO oblysy boıynsha ekologııa departamenti sý jáne balyqtan synama aldy.