Batys Qazaqstannyń Ańqaty aýylynda 16 úıge sý kirdi

<p>ORAL. KAZINFORM &ndash; Batys Qazaqstan oblysy Terekti aýdany Ańqaty aýylynda jaýyn-shashynnyń mol túsip, qardyń erýine baılanysty 16 úıge sý kirdi.</p>

BQO TJ departamentiniń baspasóz qyzmetinen málim etkenindeı, 8 aýla aýmaǵyn sý basqan. 

«Qazirgi ýaqytta 27 turǵyn mektep-ınternat ǵımaratyna kóshirildi. Úı janýarlary men qustar qaýipsiz jerlerge shyǵaryldy. Sý deńgeıin túsirý jáne qaýipsizdikti qamtamasyz etý baǵytynda sharalar qolǵa alynýda. Osyndaı jumystarǵa TJD jeke quramynan 21 adam, 4 tehnıka, 2 motopompa men 1 qaıyq, jergilikti atqarýshy organdardan 12 adam, 3 tehnıka, polıtsııa departamentinen 2 adam, 1 tehnıka tartylǵan. Sonymen qatar BQO TJ departamenti bastyǵynyń mindetin ýaqytsha atqarýshy, polkovnık Rýslan Qasybaev oqıǵa ornynda júr», - dep habarlady vedomstvodan.

Foto: BQO TJD

Eske sala keteıik, budan buryn Batys Qazaqstanda 500-den astam úı men 15 kásiporyn gazsyz qalǵanyn jazǵan bolatynbyz.

Sondaı-aq Oral qalasynda birneshe nysan men 5 kópqabatty úıdiń jertólesine sý kirdi. Osy oqıǵalarǵa baılanysty Oral qalasy ákimine qatań sógis jarııalandy.