Batys Qazaqstanda JRVI-men syrqattaný deńgeıi 50,3 paıyzǵa ósti
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń málim etkenindeı, 2023 jyldyń 1 qazanynan bastap JRVI-men 120 678 adam aýyrsa, sonyń 77 600-i (64,3 paıyzy) – 14 jasqa deıingi balalar, 697-si – júkti áıelder.
N.Mustaevtyń sózine qaraǵanda, tumaýdyń A (H3N2) túrine 81 adam shaldyqsa, sonyń 28-i – 14 jasqa deıingiler, 23-i – júkti áıelder.
Sonymen qatar paragrıpp, RS vırýsy, adenovırýs, metapnevmovırýs jáne rınovırýs sekildi tumaý tárizdes vırýstar da anyqtalýda.
Oǵan qosa jyl basynan beri bir jasqa deıingi eki sábı kókjótelmen syrqattanǵan. Balalar arasynda jıi kezdesetin kókjótel aýrýy barlyq JRVI sekildi sýyq tııýden bastalady, sodan keıin tynys alý fýnktsııasy buzylyp, shyryshty qabattary zaqymdalady. Saldarynan uzaqqa sozylatyn jótel paıda bolady.
«Osyndaı juqpaly dertterdiń taralýyna jol bermeý úshin ózdiginen emdelmeý kerek. Jedel respıratorlyq vırýsty ınfektsııalardyń alǵashqy belgileri paıda bolǵan kezde (qyzba, bas aýrýy, álsizdik) mindetti túrde turǵylyqty jerińizdegi medıtsınalyq mekemege habarlasyńyz jáne dárigerdiń barlyq usynystaryn oryndańyz. Aýrý belgileri bar, túshkiretin nemese jóteletin adamdarmen jaqyn qarym-qatynastan aýlaq bolyńyz. Bólmeni únemi jeldetip, taza ustańyz. Salaýatty ómir saltyn ustanyp, jetkilikti uıyqtańyz, durys tamaqtanyp jáne dene shynyqtyrýmen aınalysý qajet», dedi N.Mustaev.
Eske sala keteıik, budan buryn Batys Qazaqstanda qyzylshamen aýyrǵandar sany 200-den asyp ketkenin jazǵan bolatynbyz.