Batys Qazaqstanda jol apatynan 6 adam zardap shegip, bireýi kóz jumdy
BQO polıtsııa departamentiniń baspasóz qyzmetinen málim etkenindeı, oqıǵa 13 naýryz kúni Báıterek aýdany aýmaǵynda boldy.
«Shamamen saǵat 09.25-te Oral-Darııan joly boıynda Baıqonys aýyly tusynda «VAZ-2106» jáne KIA avtokólikteri soqtyǵysty. Jol apaty saldarynan bir adam kóz jumdy. Oqıǵa ornynda polıtsııa qyzmetkerleri jumys istedi. Oqıǵanyń jaı-japsary anyqtalýda», - dep habarlady vedomstvodan.
Oqıǵa kýágerleriniń sózine qaraǵanda, jol apatynan 6 adam zardap shekken. Darııan aýylynan kele jatqan avtokólik júrgizýshisi joldaǵy shuńqyrdy aınalyp ótemin dep qarsy betke shyǵyp ketken. Saldarynan Oral qalasy jaqtan kele jatqan avtokólikpen betpe-bet soqtyǵysqan.
BQO densaýlyq saqtaý basqarmasy baspasóz qyzmeti 6 adamnyń zardap shekkenin rastady. Eýropa násildes áıel jedel járdem jetkenge deıin qaıtys bolǵan. 1991 jylǵy er adam kóptegen dene jaraqatymen Oral qalalyq kópbeıindi aýrýhanaǵa jetkizildi. Qazirgi kezde shuǵyl ota jasalýda, jaǵdaıy aýyr.
Sondaı-aq 1994 jylǵy áıel qalalyq kópbeıindi aýrýhanada jansaqtaý bóliminde aýyr jaǵdaıda jatyr. 1995 jylǵy áıel, 2005 jylǵy eki jigit oblystyq kópbeıindi aýrýhanaǵa jetkizildi. Dárigerler qaraǵannan keıin qajetti medıtsınalyq kómek kórsetilip, ambýlatorııalyq em alýǵa jiberildi.