Batys Qazaqstanda Jaıyq ózenindegi sý deńgeıi jaz kezinde de kóterildi

<p>ORAL. KAZINFORM &ndash; Batys Qazaqstan oblysynda Jaıyq ózenindegi sý deńgeıi joǵarylady. &laquo;Qazgıdromet&raquo; RMK BQO fılıalynyń dırektory Tilegen Shapanovtyń málim etkenindeı, ózen deńgeıi 1 tamyzdan bastap joǵarylaǵan. Qazirgi sý deńgeıi &ndash; 294 santımetr.&nbsp;</p>

«Qazsýshar» RMK Batys Qazaqstan fılıalynyń basshysy Raýan Husaıynovtyń túsindirýinshe, Jaıyqtaǵy sý deńgeıiniń jaz kezinde kóterilýi Reseıdiń Bashqurtstan Respýblıkasy men Chelıabi oblysynda jańbyrdyń jıi jaýýymen baılanysty bolyp otyr. 

«Osyǵan oraı Irekli sý qoımasy men Jaıyq ózenine túsetin sý molaıýda. Tómengi Edil basseındik sý basqarmasy Orynbor oblysy boıynsha sý resýrstary bóliminiń bergen málimetine súıensek, Irekli sý qoımasynan Jaıyqqa jiberiletin sý kólemi 8 tamyz kúni saǵat 18.40-tan bastap sekýndyna 345 tekshe metrge deıin ulǵaıtyldy. Munyń taǵy bir sebebi, Irekli sý qoımasy kóktemnen beri 100 paıyzǵa tolyp tur. Sondyqtan olar kelgen sýdy Jaıyqqa bosatýda. Sonyń nátıjesinde Jaıyqtaǵy sý byltyrǵydan áldeqaıda kóp», - deıdi Raýan Erlanuly. 

Onyń aıtýynsha, ótken jyly 10 tamyzdaǵy málimet boıynsha Reseıden kireberistegi ıAnvartsev gıdrobeketinde Jaıyqtaǵy sý deńgeıi 133 sm, sý shyǵyny 105 tekshe metr bolǵan edi. Bıyl sol merzimde sáıkesinshe 344 sm, 548 tekshe metrge jetip otyr. Oral-Kóshim tusynda da solaı (111 sm, 120 tekshe metrden 299 sm, 484 tekshe metrge deıin) kóterilgen. 

«Jaıyq ózenimen keletin sýdyń molaıýy mamandarmen qatar turǵyndardy da qýantyp otyr», - dedi R.Husaıynov.

Eske sala keteıik, budan buryn Jaıyq ózenindegi sý deńgeıine baılanysty joǵarydan keler qaýip bar ma, sol týraly jazǵan bolatynbyz.