Batys Qazaqstanda jańadan eki mektep paıdalanýǵa berildi
Jańa ǵımarattardyń ashylý rásimine qatysqan oblys ákimi Narıman Tóreǵalıevtiń atap ótkenindeı, Memleket basshysy Qasym-Jomart Toqaevtyń tapsyrmasyna sáıkes bilim salasynda da kúrdeli máseleler qolǵa alynýda.
Sonyń biri – apatty jáne úsh aýysymdy mektepterdiń máselesin sheshý.
Aımaq basshysy óz sózinde memleket tarapynan jas jetkinshekterdiń tolyqqandy bilim alýy baǵytynda jasalyp jatqan ıgilikti isterge toqtaldy.
«Zaman talabyna saı salynǵan oqý oryndary rýhanı ordaǵa aınalyp, básekege qabiletti, otanshyl, elimizdiń týyn bıik ustaıtyn bilimdi urpaq tárbıeleıtini sózsiz», - dedi ol.
Oblys ákimi aýyl turǵyndaryn jańa nysandardyń ashylýymen jáne Táýelsizdik kúnimen quttyqtaı kele, jınalǵan jurtshylyqqa bereke-birlik, ár otbasyǵa amandyq tiledi.
Qazirgi tańda Batys Qazaqstan oblysynda 27 mekteptiń qurylysy júrgizilýde. Jyl sońyna deıin sonyń 17-sin aıaqtaý kózdelse, 10-y qoldanysqa berildi, qalǵany jaqyn kúnderi esikterin aıqara ashady.
Terekti aýdanynda jańadan ashylǵan Abaı men Eńbek aýyldaryndaǵy mektepterdiń birinde – 60, endi birinde 110 oqýshyǵa deıin bilim alady. Árqaısysynda 30 muǵalimge deıin sabaq beredi.
Abaı atyndaǵy jalpy orta bilim beretin mektebi 1952 jyly irge kótergen. Mekteptiń eski ǵımaraty 1974 jyly salynǵan, jobalyq qýaty 60 orynǵa eseptelgen, sport zaly, akt zaly joq edi. Kúni búgin mektepte 132 oqýshy bilim alýda, 30 pedagog jumys isteıdi.
Jańa ǵımaratta 9 oqý kabıneti, sonyń ishinde biriktirilgen hımııa-bıologııa, fızıka-matematıka, tilder, mýltımedııa kabınetteri bar. Sonymen qatar 2 sheberhana, 1 sport zaly, 8 oryndyq oqý zaly men kitaphana, 48 oryndyq ashana óz esigin aıqara ashpaq. Mektep ǵımaratynyń jobalyq qýattylyǵy – 108 oryn, qurylysqa el bıýdjetinen 807 mln teńge bólindi. Merdiger – «Jaıkselstroı» JShS.
Ekinshi, Eńbek negizgi orta mektebi 1966 jyly otaý tikken. 60 oryndyq jańa ǵımaratta 10 oqý kabıneti, sonyń ishinde biriktirilgen hımııa-bıologııa, fızıka-matematıka, tilder, ınformatıka jáne bastaýysh synyptar kabınetteri bar. Oǵan qosa 2 sheberhana, sport zaly, kitaphana, ashana qyzmet jasaıtyn bolady. Merdiger – «Táýekel» JShS.
Jalpy, «Jaıly mektep» ulttyq jobasy aıasynda Batys Qazaqstan oblysynda 2023-2025 jyldar aralyǵynda 18 mektep salý josparlanýda. Negizi, 2025 jylǵa deıin apatty jaǵdaıdaǵy jáne úsh aýysymmen oqıtyn mektepter máselesin tolyq sheshýge múmkinshilik bar.
Eske sala keteıik, budan buryn oraldyq ustazdyń oqýlyqty mekteptegi tájirıbeli muǵalimder jazýy kerektigin aıtqanyn jazǵan bolatynbyz.