Batys Qazaqstanda úıi sýǵa ketken turǵyn quqyǵyn sotta qorǵap shyqty

<p>ORAL. KAZINFORM &ndash; Batys Qazaqstan oblysynda ákimshilik sotpen sý tasqynynan zardap shekken turǵynnyń quqyǵy qorǵaldy.</p>

BQO sotynyń baspasóz qyzmetinen túsken málimetke qaraǵanda, tótenshe jaǵdaı saldarynan zardap shekken nysandardy tekserý, keltirilgen materıaldyq shyǵyndy esepteý jónindegi aýdandyq komıssııanyń sheshimimen azamat I-dyń menshik quqyǵynda ózge turǵynjaıy bolýyna baılanysty turǵyn úımen qamtamasyz etýden bas tartylǵan.

Talap qoıýshy shyǵarylǵan sheshimmen kelispeı, Batys Qazaqstan oblysynyń mamandandyrylǵan aýdanaralyq ákimshilik sotyna shaǵym túsirgen.

Sotta talap qoıýshy burynǵy turǵan úıi turýǵa jaramsyz bolǵandyqtan, 2021 jyly otbasymen kóship ketkendigin aıtyp, dáleldeme retinde sotqa úıdiń apatty jaǵdaıda ekendigi týraly tehnıkalyq qorytyndyny usyndy.

Sýdıa sot otyrysynda tehnıkalyq qorytyndyny zerdelep, onyń qatystylyǵy, jaramdylyǵy men anyqtyǵyn aıqyndap, isti sheshýge dálel retinde alýǵa negiz bar dep tapty. Sóıtip, azamat I-dyń menshiginde basqa turǵyn úı tirkelgenimen, onyń sáýlet-qurylys normalaryna sáıkes kelmeıtindigi, ıaǵnı apatty jaǵdaıda bolýy sheshim qabyldaǵan kezde komıssııa tarapynan elenbeı qalǵan, sol sebepten sot daý aıtylǵan sheshimdi zańsyz dep tanýǵa tolyq negiz bar degen tujyrymǵa keldi.

«Sot sheshimimen aýdan ákimine daý aıtý týraly ákimshilik talap qoıý qanaǵattandyryldy, komıssııanyń sheshimi zańsyz dep tanylyp, kúshi joıyldy. Aýdan ákimdigi jiberilgen buzýshylyqty joıyp, talap qoıýshynyń buzylǵan quqyqtary men zańdy múddelerin qalpyna keltirýge mindetteldi», dep habarlady vedomstvodan.

Eske sala keteıik, budan buryn Batys Qazaqstanda úıi sýǵa ketken turǵyndardyń baspanamen qalaı qamtylǵanyn jazǵan bolatynbyz.