Batys Qazaqstanda turǵyn úıdegi órt sany 2,5 ese artqan

<p>ORAL. KAZINFORM &ndash; Batys Qazaqstan oblysynda jyl basynan beri 572 órt oqıǵasy tirkelip, sonyń saldarynan 3 adam qaza taýyp, 8-i túrli jaraqat aldy.</p>

BQO TJD memlekettik órt baqylaý basqarmasynyń bastyǵy Mereke Jumaǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, órtten 473 mln 032,4 myń teńge shyǵyn keltirilgen.

Mereke Baýyrjanulynyń sózine qaraǵanda, ótken jylǵy osy kezeńmen salystyrǵanda, órt sany 26,5 paıyzǵa (2023 jyly – 452), jaraqat alǵandar 14,2 paıyzǵa (7) ósse, mert bolǵandar (2023 jyly – 8) 62,5 paıyzǵa tómendegen.

Basqarma bastyǵynyń aıtýynsha, turǵyn úıde 328 órt bolyp, bul ótken jylǵydan (272) 20,5 paıyz artty.

Órttiń negizgi sebepteri – otty uqypsyz paıdalaný (107), elektr jabdyqtaryn (250), sondaı-aq peshterdi ornatý jáne paıdalaný kezinde órt qaýipsizdigi erejelerin buzý (47).

Órt qaýipsizdigi erejelerin buzǵany úshin 357 tulǵa ákimshilik jaýapkershilikke tartyldy. Sonyń ishinde 284-ine eskertý berilip, 73-ine (9 zańdy, 1 laýazymdy jáne 63 jeke tulǵa) 4 mln 227,340 myń teńge aıyppul salyndy.

«Bıylǵy 1 qazannan bastap turǵyn úı sektorynda 18 órt bolyp, bul ótken jylǵydan (7) 2,5 esege asyp tústi. Ókinishke qaraı, 14 jastaǵy jasóspirim jaraqat aldy. Oqıǵa 3 qazan kúni Aqsaı qalasynda Alashorda kóshesi 47-mekenjaıynda bolyp, 15 sharshy metr aýmaqta jeke turǵan metall garaj otqa orandy. Saldarynan 2009 jylǵy bala 35-40 paıyz kúıik jaraqatyn aldy. Órt sóndirýshiler kelgenge deıin garajda gaz ballony jarylǵan», - deıdi M.Jumaǵalıev.

Basqarma bastyǵynyń túsindirýinshe, adamdardyń qaza bolýy men jaraqat alýynyń aldyn alýǵa baǵyttalǵan is-sharalardyń biri – turǵyn úılerde ýly gaz datchıkterin ornatý. Osy kezge deıin ótken jyldan beri jergilikti atqarýshy organdar men demeýshilerdiń qoldaýymen áleýmettik osal topqa jatatyn turǵyndardyń úılerine 362 datchık ornatyldy. Budan bólek, demeýshilerdiń kómegimen «QAZAQGAZ AIMAQ» AQ Batys Qazaqstan óndiristik fılıalymen birlesip halyqtyń áleýmettik osal toptarynyń turǵyn úılerine gaz analızatorlaryn ornatý jumystary da qolǵa alyndy. 2023-2024 jylǵy jylý berý kezeńinde esepke alynǵan 443 otbasynyń turǵyn úılerine 424 (qamtylýy – 95,7 paıyz) datchık qoıyldy.

Eske sala keteıik, budan buryn BQO turǵyny aýyldasynyń shóbine ot qoıyp, tórt úıde 30 tonna pishen janyp ketkenin jazǵan bolatynbyz.