Batys Qazaqstanda tártip saqshylaryna 45 avtokóliktiń kilti tabys etildi
Polıtsııa qyzmetkerleri saltanatty sapqa turǵan is-sharaǵa qatysqan Batys Qazaqstan oblysynyń ákimi Narıman Tóreǵalıev jeke quramdy merekemen quttyqtap, quqyq qorǵaý organdarynyń materıaldyq-tehnıkalyq bazasyn jaqsartýdyń mańyzyn atap kórsetti.
«1990 jyly 25 qazanda qabyldanǵan Qazaqstannyń egemendigi týraly deklaratsııa el Táýelsizdigine jol ashty. Qazirgi ýaqytta halqymyzdyń ómirlik jaǵdaıyn jaqsartýǵa baǵyttalǵan memlekettik reformalar júzege asyrylyp jatyr. Memleket basshysy quqyq qorǵaý organdarynyń júıesin reformalaý aıasynda naqty mindetter qoıdy. Bul rette polıtsııanyń azamattarymyzdyń qaýipsizdigin qamtamasyz etý jolynda tyń úlgige kóshýi mańyzdy. Jańadan alynǵan avtokólikter qylmyspen kúrestiń tıimdiligin arttyryp, jumys sapasyn jaqsartýǵa septesedi dep senemiz», - dedi óńir basshysy.
«Egemen elde halyqtyń beıbit ári tynysh ómir súrýi úshin tártip saqshylaryna júkteler mindettiń júgi aýyr. Bizdiń basty mindetimiz – qoǵamdaǵy qaýipsizdikti qamtamasyz etý. Osy jolda polıtsııa qyzmetkerleri óz mindetin adal oryndap, jaqsy nátıjelerge qol jetkizedi dep senim artamyn», - dedi BQO polıtsııa departamentiniń bastyǵy, polıtsııa polkovnıgi Arman Orazalıev.
Ulyq merekege oraı oblys ákimdiginiń qoldaýymen alynǵan 45 avtokóliktiń kilti ýchaskelik polıtsııa ınspektorlaryna tabys etildi. Jol talǵamaıtyn kólikterdiń 25-i oblys ortalyǵynda qalsa, 20-sy aýdandarǵa beriledi. Jyl sońyna deıin departamentke taǵy da avtokólikter alynatyn bolady. Sonymen qatar BQO qorǵanys isteri jónindegi departamentine 12 jeńil jáne 1 júk kóliginiń kilti tapsyryldy. Avtokólikterdiń barlyǵy tutastaı zamanaýı qurylǵylarmen jabdyqtalǵan.
Merekelik is-shara barysynda vedomstvo basshysy polıtseılerge memlekettik nagradalardy saltanatty túrde tabys etti. Іshki ister mınıstriniń jáne departament bastyǵynyń buıryǵymen qyzmettik mindetterin adal atqarǵany jáne joǵary nátıjelerge qol jetkizgeni úshin birqatar qyzmetker tósbelgi, gramota jáne alǵyshattarmen marapattaldy. Buǵan qosa birqatar qyzmetkerge merziminen buryn arnaıy ataq berildi. Qyzmetke jańadan qadam basqan tártip saqshylary ant qabyldady.