Batys Qazaqstanda taǵy bir aýyl turǵyndaryn evakýatsııalaý júrgizilip jatyr

<p>ORAL. KAZINFORM &mdash; Shyńǵyrlaý ózeninde sýdyń qaýipti deńgeıden asýy Bórli aýdany ortalyǵy Aqsaı qalasy quramyndaǵy Araltal aýyly turǵyndaryna qaýip tóndirdi.</p>

Bórli aýdany sáýlet, qala qurylysy jáne qurylys bóliminiń basshysy Ádiljan Ótebaevtyń málim etkenindeı, 29 naýryzdan 30-yna qaraǵan túni atalǵan aýyl turǵyndaryn evakýatsııalaý bastaldy.

Onyń sózine qaraǵanda, budan buryn Bórli aýdany ákimi apparaty tarapynan áleýmettik jeli arqyly araltaldyqtarǵa erterek qamdanyp, eń qajetti kıim-keshek pen qujattardy ózimen birge alyp shyǵý eskertildi.

Habarlamada úıdegi turmystyq tehnıkalardy joǵary kóterip, baspanadaǵy kógildir gaz, elektr qýatyn jáne sýdy aıyryp, evakýatsııa belgilengen orynǵa kelý suraldy. Aqsaı qalasyndaǵy №8 orta mektep evakýatsııalyq oryn bolyp bekitildi.

«Atalmysh mektepke qazir eki otbasy ornalasty. Turǵyndardyń birazy týǵan-týystarynyń úıine ketýde. Kómek suraǵandarǵa evakýatsııalyq qosynǵa jetkizýge avtobýs, basqa da kólikter daıyn. Araltal aýylynda 1 myń adam turady», - dedi Á.Ótebaev.

BQO TJ departamentiniń 29 naýryzdaǵy málimeti boıynsha Batys Qazaqstan oblysynda osyǵan deıin qutqarýshylar, jergilikti atqarýshy organdardyń kúshimen aldyn ala 1065 adam evakýatsııalanyp, 2195 bas mal qaýipsiz jerge aıdalǵan edi.

Eske sala keteıik, budan buryn BQO-da Shyńǵyrlaý ózeni arnasynan asyp, bir aýylǵa sý kirgenin jazǵan bolatynbyz.

Sondaı-aq BQO-da myńǵa jýyq adam sý tasqynyna qarsy jumystarǵa jumyldyryldy.