Batys Qazaqstanda sý tasqyny saldarynan 6 myńǵa jýyq úıge zalal kelgen
BQO ákimdiginen málim etkenindeı, sonyń ishinde 1 358-i – turǵyn úı. Oǵan qosa 4 569-y – turǵyndardyń jalǵyz baspanasy bolyp sanalatyn saıajaı úıi.
Kúni búginge deıin 4 929 turǵyn úı boıynsha tehnıkalyq tekseris qorytyndylary shyqty. Soǵan sáıkes 3 023 turǵyn úı turýǵa jaramsyz dep tanyldy. 1 906 úıge jóndeý jumystaryn júrgizý qajet.
Jyljymaıtyn múlikke keltirilgen zalaldy óteý úshin 775 jańa turǵyn úı salý jóninde sheshim qabyldandy. Sonyń ishinde 374-i Oral qalasynda, 401-i aýdandarda boı kótermek. Sonymen qatar daıyn turǵan 2 248 úıdi satyp alý, 1 906 úıge jóndeý jumystaryn júrgizý meje retinde belgilengen bolatyn. Qazirdiń ózinde 864 úı (aýdandarda – 98, qaladaǵy saıajaı turǵyndaryna – 766) satyp alyndy. 906 turǵyn úıge jóndeý jumystary jasaldy.
«Sý tasqynynan zardap shekkender úshin salynyp jatqan turǵyn úıler qurylysyn tamyz aıynyń sońyna deıin aıaqtaý kózdelip otyr. Onyń sapasyn jergilikti atqarýshy jáne qadaǵalaýshy organdarmen qatar turǵyndardyń ózderi de baqylaı alady. Taǵy bir aıta keter jaıt, birqatar aýdandarda úı ıeleri ózderiniń baspanasyn salyp jatqan kompanııalarda jumys istep, tabys taýyp otyr. Turǵyn úı qurylysy elimizdiń iri kásipkerleri men bankterden, kompanııalardan «Aqjaıyq» qory arqyly kelip túsken qarjy esebinen júrgizilip jatyr», - dedi Kazinform tilshisine BQO ákiminiń orynbasary Tilepbergen Kaıýpov.
Eske sala keteıik, budan buryn BQO-da turýǵa jaramsyz dep tanylǵan 456 úıdi qalpyna keltirý jumystary bastalǵanyn jazǵan edik.