Batys Qazaqstanda shyǵyn bolǵan 1 myń malǵa ótemaqy tólendi

<p>ORAL. KAZINFORM &ndash; Batys Qazaqstan oblysynda aýdandarda qurylǵan komıssııalar sý tasqyny saldarynan 2 457 bas maldyń shyǵynǵa ushyraǵanyn anyqtady.</p>

BQO ákiminiń orynbasary Qalııar Aıtmuhambetovtiń Kazinform tilshisine málim etkenindeı, sonyń ishinde 368 iri qara (Bórli, Qaratóbe, Syrym, Terekti, Báıterek aýdandarynda), 92 bas jylqy (Bórli, Qaratóbe, Syrym), 1 743 qoı-eshki (Bórli, Qaratóbe, Syrym, Terekti, Báıterek), 116 shoshqa (Báıterek, Bórli) jáne 138 úı qusynyń (Qaratóbe, Terekti, Báıterek) ólgeni tirkeldi. 

Qalııar Shadııarulynyń sózine qaraǵanda, veterınarlar jergilikti ákimdiktermen birlese otyryp, mal ólekselerin qazylǵan jerde órteý jolymen joıdy. 

«Ótemaqy esebinde 187 mln 491,1 myń teńge qarastyrylǵan bolatyn. Sonyń 140 mln 162,1 myń teńgesi sáýir aıyna, 47 mln 329 myń teńgesi maýsymǵa josparlandy. Degenmen retine qaraı mamyr aıynda da tólene beredi. Kúni búginge deıin 141 ótinish boıynsha aýdan ákimdikteri 1 myń bas úshin (177 iri, 671 qoı-eshki, 46 jylqy, 54 shoshqa jáne 52 úı qusy) 126 mln 912,4 myń teńge ótemaqyny tóledi», - dedi Q.Aıtmuhambetov. 

Onyń aıtýynsha, sý tasqyny kezinde qutqarý jumystary barysynda 7 626 bas mal, sonyń ishinde 2 696 iri qara (Aqjaıyq – 360, Terekti – 696, Syrym – 447, Bórli – 814, Báıterek – 130, Oral qalasy – 249), 3 082 qoı-eshki (Terekti – 864, Syrym – 731, Bórli – 1 205, Báıterek – 130, Oral qalasy – 152), 1 847 jylqy (Aqjaıyq – 1 873, Bórli – 41, Terekti – 2, Oral qalasy – 21) jáne oblys ortalyǵynda 1 túıe qaýipsiz jerlerge aıdaldy. 

Qazirgi tańda oblysta sý tasqyny saldarynan keltirilgen zalaldy óteý jumystary jalǵasýda. 

Eske sala keteıik, budan buryn BQO-da turýǵa jaramsyz dep tanylǵan 456 úıdi qalpyna keltirý jumystary bastalǵanyn jazǵan bolatynbyz.