Batys Qazaqstanda shaǵyn jáne orta kásipkerlikti qoldaýǵa 2,7 mlrd teńge bólinip otyr
BQO kásipkerlik jáne ındýstrıaldyq-ınnovatsııalyq damý basqarmasynyń basshysy Nurjan Ótepbaevtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde paıyzdyq mólsherlemeni sýbsıdııalaýǵa – 2 403,1 mln teńge, nesıelerdi ishinara kepildendirýge – 170,1 mln teńge, granttyq qarjylandyrýǵa 142,1 mln teńge bólindi.
Onyń sózine qaraǵanda, jyl sońyna deıin paıyzdyq mólsherlemeni sýbsıdııalaý tetigi boıynsha 334, ishinara kepildendirý úshin 52, memlekettik granttar berý baǵytynda 29 jobany maquldaý josparlanǵan.
«Bıylǵy jyldyń tórt aıynda paıyzdyq mólsherlemeni sýbsıdııalaý tetigi boıynsha 135 joba maquldanyp, sýbsıdııa tólemi 1 174,4 mln teńge boldy. Nesıelerdi ishinara kepildendirý aıasynda 50 shartqa (85 mln teńge) qol qoıyldy», - dedi basqarma basshysy.
N.Ótepbaevtyń aıtýynsha, 2023 jyly bul maqsatqa 2 mlrd teńge qaraldy. Jyl qorytyndysy boıynsha paıyzdyq mólsherlemeni sýbsıdııalaý tetigi aıasynda 429 shartqa (1 681,5 mln teńge) qol qoıyldy. Nesıelerdi ishinara kepildendirý úshin 331 shart (162,8 mln teńge) jasaldy. Memlekettik granttar boıynsha 137,8 mln teńgege 33 joba qoldaý taýyp, qarjylandyryldy.
Batys Qazaqstanda 1 mamyrdaǵy málimet boıynsha 57 486 shaǵyn jáne orta kásipkerlik nysandary jumys istep tur. Sońǵy bes jylda atalmysh nysandar 9,1 trln teńgeniń ónimin shyǵarsa, sonyń 2 319 mlrd teńgesi ótken jyldyń úlesine tıedi. Jyl basynda 125,4 myń adam jumys istese, bul ótken jylǵy osy kezdegiden 2,5 paıyzǵa artyq.
«2010 jyldan bastap «Bıznestiń jol kartasy – 2020, 2025», «2021-2025 jyldarǵa arnalǵan kásipkerlikti damytý boıynsha ulttyq joba» aıasynda memlekettik qoldaý sharalarymen 146,9 mlrd teńgege 16 myń joba qarjylandyryldy. Quptalǵan jobalar nátıjesinde 30 myńnan astam jumys orny saqtalyp, 7 myńnan astamy jańadan ashyldy. Bul baǵyttaǵy jumystar aldaǵy ýaqytta da jalǵasady», - dedi N.Ótepbaev.