Batys Qazaqstanda reseılik áskerı tehnıka aýyl ishimen júrgen

<p>ORAL. KAZINFORM &ndash; Batys Qazaqstan oblysy Bókeı ordasy aýdany Saıqyn aýylynda reseılik áskerı tehnıkanyń júrgeni týraly áleýmettik jelide beınejazba taraldy.</p>

Bókeı ordasy aýdany ákimdiginen málim etkendeı, atalmysh aýdan aýmaǵynda halyqaralyq kelisimshartqa sáıkes Reseı Federatsııasy Qazaqstannan jalǵa alǵan polıgon jeri bar.

«Reseılik tehnıka kelisimge sáıkes polıgonǵa eldi mekenderden tys jerlermen qatynaıdy. Alaıda birneshe kún boıy jaýǵan jańbyrdyń saldarynan joldyń buzylyp ketýine baılanysty 20 qazan kúni 5 avtokólik Saıqyn aýyly ishindegi qatqyl tabandy jolmen júrgen. Avtokólikterdiń biri gaz qubyryn qaǵyp ketken. Degenmen budan eleýli buzýshylyq bolmaǵan, gaz shyqqan joq. Qazirgi kezde jergilikti atqarýshy organdar men Bókeı ordasy aýdany polıtsııa bólimi oqıǵanyń mán-jaıyn anyqtap, kináli adamdardy jaýapkershilikke tartý máselesi qarastyrylýda. Kelisimge sáıkes atalǵan áskerı tehnıkamen arnaıy polıtsııa kóliginiń birge júrýi qarastyrylmaǵan», - dep habarlady vedomstvodan.