Batys Qazaqstanda onkolog mamandar jetispeıdi
BQO onkologııalyq dıspanseri dırektorynyń orynbasary Nurlan Tólemisovtiń óńirlik kommýnıkatsııalar qyzmeti alańynda ótken brıfıngte málim etkenindeı, elimizde onkologııalyq aýrýlardan bolatyn ólim-jitim kóp tirkeledi. Jalpy ólim kórsetkishinde ekinshi orynda tur.
Onyń sózine qaraǵanda, Qazaqstanda onkologııalyq kómek kórsetýdi jaqsartý maqsatynda keshendi jospar men jol kartasy qolǵa alynǵan.
«Oblysta barlyǵy 25 onkologııalyq jáne 130 tekserý kabıneti (98-i – áıelder, 32-si – erler) jumys isteıdi. Jergilikti jerlerde jumysty uıymdastyrýdaǵy negizgi problemalardyń biri kadr tapshylyǵy bolyp qalyp otyr. Alǵashqy medıtsınalyq-sanıtarlyq kómek deńgeıinde negizgi qyzmetker –12 onkolog dáriger (48 paıyz) jáne 13 qosymsha atqarýshy dáriger (52 paıyz) qyzmet atqarady. Oral qalasyndaǵy tórt emhana men «Batys AvıGıp» JShS-da bes, aýdandyq aýrýhanalarda 8 onkolog maman jetispeıdi. Óńirdegi jaǵdaıdy jaqsartý úshin kadrlardy daıarlaý, qyzmetke jas mamandardy tartý boıynsha júıeli jumys qajet», deıdi N.Tólemisov.
Onyń aıtýynsha, oblystyq onkologııalyq dıspanserdiń ózinde sarapshy-dáriger, ahýaldyq ortalyq dárigeri joq. Degenmen dıspanser 4 jas mamanmen tolyqtyrylǵan.
«Medıtsınalyq uıymdardyń aldynda turǵan mańyzdy mindetterdiń biri – qaterli isikti erte satyda anyqtap, onyń asqynýyna jol bermeý, ólimniń aldyn alý. Jyl basynan beri tirkelgen qaterli isik aýrýy (1 218) ótken jylǵy osy kezeńmen salystyrǵanda, bir deńgeıde qalyp otyr. Sonyń ishinde 363-i nemese 30,6 paıyzy (Qazaqstanda – 31,5 paıyz) erte satysynda anyqtaldy. Onkologııalyq aýrýlardy erte anyqtaý úshin medıtsınalyq kómekke ýaqytyly júginip, profılaktıkalyq jáne skrınıngtik tekserýlerden ótý qajet», dedi dıspanser dırektorynyń orynbasary.
Eske sala keteıik, budan buryn BQO-da 600-den astam qyz balanyń adam papıllomasy vırýsyna qarsy egilgenin jazǵan bolatynbyz.