Batys Qazaqstanda memlekettik qyzmet salasynda 160-tan astam oryn bos tur

<p>ORAL. KAZINFORM — Batys Qazaqstan oblysynda memlekettik qyzmetshilerdiń shtattyq sany 3 447 bolsa, naqty sany — 3 284. QR Memlekettik qyzmet isteri agenttigi BQO boıynsha departamentiniń basshysy, ádep jónindegi keńes tóraǵasy Murat Baısalovtyń óńirlik kommýnıkatsııalar qyzmeti alańynda ótken brıfıngte málim etkenindeı, bos laýazymdar sany — 163.</p>

Onyń sózine qaraǵanda, 106 memlekettik qyzmetshi aýysyp ketken. 

«Jyl basynan beri jergilikti atqarýshy organdarmen 500 bos laýazymǵa ornalasýǵa konkýrstar ótkizilip, olarǵa 719 adam qatysyp, sonyń 325-i jeńimpaz bolyp tanyldy. Іrikteýdiń jańa júıesi boıynsha 130 bos laýazymǵa ótkizilgen konkýrstarda 223 adam baq synap, sonyń 99-y jeńimpaz atandy. Jergilikti atqarýshy organdarda joǵary turǵan laýazymdarǵa 70 memlekettik qyzmetshi taǵaıyndaldy, merıtokratııa qaǵıdaty 73,68 paıyz boldy», — deıdi M.Baısalov. 

Onyń aıtýynsha, Memleket basshysynyń tapsyrmasyn oryndaý maqsatynda memlekettik qyzmetke kirýde artyq kedergilerdi joıý tártibin jeńildetý boıynsha qoldanystaǵy zańnamaǵa tıisti ózgerister engizilgeni belgili. 

Osylaısha, memlekettik grantpen oqý oryndaryn joǵary kórsetkishpen aıaqtaǵan úzdik túlekter aýdan men aýyldyq jerlerde tómengi laýazymdarǵa konkýrstyq irikteýsiz, tikeleı taǵaıyndalýǵa múmkindikteri bar.

Bul bilikti jastardy memlekettik qyzmetke yntalandyrýǵa, jas mamandardyń aýdan men aýyldyq aımaqtarǵa oralýyna, sonymen qatar óńirlerdegi kadr tapshylyǵyn azaıtýǵa septigin tıgizip, memlekettik qyzmetke kirýdi jeńildetedi.  

Norma engizilgennen bastap joǵary oqý oryndarynyń 44 túlegi aýdandyq jáne aýyldyq deńgeıdegi memlekettik laýazymdarǵa ornalasty (2023 jyly — 9, 2024 jyldyń basynan beri — 35).

M.Baısalovtyń málimdeýinshe, ádep jónindegi keńes otyrystarynda 46 másele qaralsa, sonyń 35-i nemese 76 paıyzy zańbuzýshylyqtardyń aldyn alýǵa baǵyttaldy. 

Departament qyzmetiniń negizgi baǵyttarynyń biri — azamattar men memlekettik qyzmetshilerdiń quqyqtaryn qorǵaý jáne olardy qalpyna keltirý.

Bul rette jekelegen memlekettik organdarda jumys berýshiniń ústeme jumysqa tartý týraly buıryǵy rásimdelmeı, qyzmetshilerdiń jumys ornynda otyrǵandary anyqtaldy. Monıtorıng nátıjesi boıynsha 152 memlekettik qyzmetshiniń quqyqtary qalpyna keltirilip, olarǵa demalys ýaqyty usynyldy.

Sondaı-aq 13 memlekettik qyzmetshige qatysty zańnama talaptary saqtalmaı qoldanylǵan tártiptik jazalardyń kúshteri joıyldy. 

«Sonymen qatar, keıbir memlekettik organdarmen zańnama talaptaryn durys qoldanbaý saldarynan memlekettik qyzmetshilerge tólenýge tıisti bonýstar tólenbegen jaǵdaılar oryn alǵan. Sóıtip 25 memlekettik qyzmetshige 6,7 mln teńge kóleminde negizsiz tólenbegen bonýstardy tóleý qamtamasyz etildi. Oǵan qosa jyl saıynǵy eńbek demalysyna aqy tóleý merzimderi buzylǵany úshin 106 memlekettik qyzmetshige 188 myń teńge kóleminde ósimpuldar tólendi. Oblystaǵy jergilikti atqarýshy organdarda issapar shyǵyndary ýaqytyly tólenbegen 77 memlekettik qyzmetshige tıisti 4,7 mln teńge kóleminde tólemder júrgizildi», — deıdi departament basshysy.

Departament málimetterine qaraǵanda, óńirde baqylaý sharalary nátıjesinde memlekettik qyzmet týraly zańnamanyń 4 myńnan astam buzýshylyq derekteri anyqtalǵan. Memlekettik organdar kóp jaǵdaıda memlekettik qyzmetshilerdiń issaparǵa barý, eńbek demalysyna shyǵý jáne qyzmettik tizimdi toltyrý tártibin saqtamaıdy.

Eske sala keteıik, budan buryn BQO-da balaǵat sóz aıtqan aýyl ákiminiń tártiptik jaýapkershilikke tartylǵanyn jazǵan bolatynbyz.