Batys Qazaqstanda Kóshim kanalynda sý deńgeıi qaıta kóterildi

<p>ORAL. KAZINFORM - Batys Qazaqstan oblysy Báıterek aýdanynda Kóshim kanalynda sý deńgeıi bir táýlikte 43 santımetrge kóterildi.</p>

«Qazgıdromet» RMK BQO fılıalynyń 1 mamyr kúngi tańǵy saǵat 08.00-degi málimeti boıynsha kanaldaǵy sý deńgeıi 817 santımetrdi kórsetip, qaýipti shekten (800 sm) qaıta asyp ketti.

Keshe osyndaı ýaqytta sý deńgeıi 774 santımetr bolǵan edi.

Sol sekildi Jaıyq ózenindegi sý deńgeıi Aqjaıyq aýdany Taıpaq gıdrobeketinde bir táýlikte 34 santımetrge joǵarylady. Qazir munda 7 metrge (699 sm, qaýipti shegi - 850 sm) jýyqtady.

Jaıyq ózeniniń basqa gıdrobeketterinde sý deńgeıi túsip jatyr.

Aqjaıyq aýdany turǵyndarynyń sózine qaraǵanda, birneshe aýylda aýyz sý uńǵymalaryn sý basqan. Soǵan baılanysty aýyldardy aýyz sýmen qamtýda qıyndyqtar týyndap otyr.

Aýdan ákimi Murat Serdalın bul máseleniń ras ekendigin jetkizdi.

«Aýyz sý uńǵymalarynyń kóbi Jaıyq ózeni boıynda tómende, saı-salada ornalasqan. Sondyqtan olardyń bárin tasqyn sýdan alyp qalý múmkin bolmady. Degenmen aldyn ala rezervýarlarǵa sý jınaqtadyq. Turǵyndarǵa eskertip, qudyqtarǵa sý quıdyrttyq. Aýyldyq okrýgterde jeti-on kúnge jetetin sý qory bar», dedi M.Serdalın.

Eske sala keteıik, budan buryn BQO-da tasqynnan japa shekken 1 690 adamǵa 612 mln teńge materıaldyq kómek kórsetilgenin jazǵan bolatynbyz.

Sondaı-aq BQO-da jaǵdaıdyń turaqtalýyna baılanysty 100 atys qarýy ıelerine qaıtaryldy.